我怎可能是女神👸🏻獵人🏹（第一季更新至斷更為止）: 776

到咗星期日，我同阿健去到街場摻隊，專登打對家，佢企返社隊嘅右鋒，我就係同線嘅左衛，由於街場細一截，我哋差唔多每分鐘都有機會撞到正，為嘅就係模擬下到咗星期五嘅決賽。
其實…呢兩個位都唔係多人爭嘅位嚟，由於大部份人主力都係用右腳踢波，企左衛要攔截同大腳出波都唔係易事，身位容易貼邊，甚至要轉身回傳畀龍門；而右鋒呢，其實踢得舒服嘅，可惜係舒服喺傳中，而唔係射門，睇怕佢哋隊嘅左鋒同中鋒都係想接收佢嘅出波跟住入球。
Anyway，足球嘅嘢我都係㞗吹，總之到嗰日我呢個自由人就點都要阻佢嘅好事…因為，我心中慢慢浮現咗一個架構出嚟，雖然暫時重未有定案。
健：「妖，你條友仔真係好煩！」
踢咗三粒鐘，呢個係佢嘅結論。
我：「吓，做後衛係咁㗎啦，有破壞但未必有建設，最緊要阻止你高速突破做成單刀嘅局面，無論係攔截成功，出界，迫落底線，甚至吹停埋，觀眾都唔會怪我，但如果漏咗你入去我就係罪人。」
健：「你剩係睇住我，小心另外嗰邊係咁入波。」
我：「無計啦，我又唔識分身，瘟神到時會兼顧㗎啦，我覺得對住你好玩啲，其他人我又唔識。」
健：「都唔知你係為咗嚟玩定為咗贏。」
我：「當然係玩啦…呀唔係，係為咗交功課。」




因為有一個唔知係乜叫做小功嘅東西。
我：「不過瘟神話贏咗嘅話就有大餐食。」
健：「又嚟呢啲…真係識收買人心，Bubble話嗰晚都會聚餐，當係贏咗慶祝食飯又好，或者當喺社嘅結業晚餐，有份踢波嘅都可以去。」
如果佢哋贏咗無端端有六千蚊食，而Bubble一蚊都唔使出實開心死。
我：「嘻嘻，我哋出力幫佢哋做show，慰勞下都好應該嘅，贏咗我實起哄叫瘟神加餸。」
健：「我就唔係好想去，得我一個中三，都無乜邊個係識嘅，除咗Bubble就無人理我。」
我：「有大波師姐理你，唔係好幸福咩？」
健：「唔好，我都唔想黐埋去，費事啲同學以為我好鹹濕。」
我：「你咪又係見佢有對波先咁順攤應承佢。」
健：「一件還一件，唔等於我要表達到自己成個胸奴人咁，我係真心踢波嘅。」




我：「唔怪之得無乜男仔會主動接近佢…」
係嘅，係比較礙眼，正如女仔有時都怕自己對波生得太健康然後好多仔望，所以我先同Wendy講大波無罪，揸奶有理。
呀！係喇！我諗通咗喇！
我：「我諗到同你打賭乜喇！決賽如果自己嗰隊輸咗，就要走去讚Bubble波波又大又靚！」
健：「黐線嘅咩你！食咗藥未呀…」
我：「又唔係叫你話佢鶻突，讚佢咋嘛。」
健：「我無你咁變態呀，你返去讚Queenie嗰對啦。」