我怎可能是女神👸🏻獵人🏹（第一季更新至斷更為止）: 800

聽日成日唔喺屋企，點都要同QQ交待下嘅，用乜嘢原因好呢，然後我轆轆下電話見到個廣告。
我：「Queenie，阿健想約我聽日去書展呀。」
Q：「哦，去囉，乜你哋都啱呢啲嘢嘅咩？」
我：「唔知呀，佢好似想去買文青女神嘅書。」
Q：「嗯，邊個呀？沈卓怡？張羨青？」
我：「係掛，我都唔識嘅…妳唔會想去㗎可？」
Q：「有乜好去，呢個年頭想睇書邊使去同人迫。」
我：「咁…你聽日自己搞掂午餐喇。」
Q：「無問題，我而家約男朋友聽日出去玩。」
…，其實會唔會係Yvonne想我陪佢去書展呢？佢乜都唔肯同我講，又唔使我準備啲乜，斷估就唔會去啲乜嘢特別嘅地方，可能純粹搵我嚟解悶。




結果話咁快就到咗第二朝，少有地我起身嘅時候佢重攬住吉百利瞓緊，呢個女神就只有瞓覺豬嘅時候先係最可愛…而我就靜靜雞咁去洗頭刷牙洗面，話晒要同靚女出街，點都要企理少少嘅，雖然我只係被迫；然後再揀啲新淨少少嘅衫褲鞋襪，呀，再孭個背囊，入面放枝水，一把縮骨遮，加多包紙巾，咁樣應該可以令我唔會死得咁慘？
未夠八點九就到咗熱狗店，人哋都未開門。
Y：「算你準時啦。」等咗五分鐘就見到條臭…
我：「嘩…妳搞乜鬼…」佢戴住副黑超，一身全白色oversize T恤，但衫腳只係夠冚住三份一截大髀左右，件衫係明顯地薄，透晒入面嘅鮮橙色內衣，然後左右手各攞住一個裝滿嘢嘅大紙袋，整體嚟講極其九唔搭八唔知想點咁。
Y：「喂！幫我攞嘢啦，望住我做乜！」
我一隻手接過佢兩個大紙袋，然後就俾佢扯住手臂行，對比起佢平時淑女般嘅步姿，而家嘅佢就好似趕住去打仗或者走難咁，我哋到底要去邊？
入咗大商場，上咗四層樓，佢拖住我入去殘廁，然後鎖埋門…政府宣傳短片都講過，遇到陌生人摸摸要大聲嗌唔好，千祈唔好跟人入後巷，唔通…佢要喺度將我就地正法，強姦我？
我：「主子…妳唔係咁早就要我同妳爆殘廁呀？我早餐都未食喎…」
Y：「我爆你老母呀，鬼得閒同你爆殘廁。」
唔知點解，我覺得女魔頭爆粗係非常恰如其分，本來其他人講我阿媽係會搞到我好火，但我feel到媽咪如果見到呢個死靚妹話要爆佢係會笑出聲。




我：「妳做乜著到咁？個Bra同條底透晒…」
點知佢即刻喺我面前拉高自己件長衫。
我：「嘩！非禮勿視…」我專登擰乜面，費事佢又入我，話我鹹濕仔䚎蝕佢要我賠償。