警告:呢一日長度媲美兩年等一日

Y:「妖你識唔識嘢㗎!Bikini嚟㗎!」
我望一望,條鮮橙色底…其實底同Bikini有乜分別?QQ講得啱,我真係唔識分,不過側邊有個黑色圈圈扣起塊布又幾靚咁款…
我:「主子做乜著泳衣,我哋要去邊?我乜都無準備喎。」如果係陪佢去游水我負責看嘢都OK嘅。
Y:「聽住,你今日要陪我去船P,身份係扮演我嘅男朋友,總之所有嘢你聽晒我講就得。」
我:「乜!乜…嘢事?船P?!點解唔早啲叫我準備?同埋我要…做妳條仔?吓?」我一頭霧水…
Y:「咪嘈住先!靠你準備就死得,同我坐低!」
佢拉低咗塊廁板,扯咗我上去坐,然後喺其中一個紙袋入面攞咗罌嘢出嚟,打開抹落我頭度。
我:「做乜?!妳到底想點…」


Y:「髮蠟嚟㗎,你咁嘅衰樣點見人喎。」
我:「乜嘢衰樣喎,我本嚟就好好地地,乜問題都無!」其實…我好憎有啲黏黐黐嘅嘢喺身上面。
Y:「乖啦…你要配合返個人設吖嘛。」
佢兩隻手喺我個頭上面左攪右攪,我知我無得揀,就好似隻木頭公仔咁俾佢玩。
Y:「好彩你個樣都見得下人,執一執唔算失禮。」
我:「妳不如話畀我聽一陣要做啲乜先啦…」
Y:「咪話咗陪我去船P,其他人係我青年管弦樂團啲friend嚟。」唉,富家女…天呀,擺明要我去失禮人啫,我都唔鍾意呢啲場合嘅。
我:「吓…我唔識玩樂器㗎喎…」
Y:「低B,而家係去船P,唔係叫你去表演,你識游水㗎?拜託你唔好浸親失禮我。」
我:「游水就無問題,但我乜都無帶喎。」


Y:「你擔心啲乜,咪話咗我已經幫你準備好晒。」
我:「咪住先,你明明有仔,做乜唔叫佢同妳去,點解要我扮做妳條仔。」呢個女仔絕對唔會咁好死諗住益我,一定係有啲嘢嘅。
Y:「我同佢冷戰緊,唔可以搵佢先,如果唔係我就輸。」到底…你兩隻嘢有幾咁無聊?
我:「哈,唔搵佢就贏…人哋分分鐘而家陪緊第二條女,諗緊點氹妹妹仔上床。」
Y:「可能,我唔想諗,唔好俾我知,但係我都可以紅杏出牆,不過我勸你就唔好激嬲我。」
都係,人為刀俎,我慳返啲口水好過。
Y:「嗱,而家同我換咗呢套衫褲佢。」
我:「做乜要換呀…妳畀條泳褲我咪得囉。」
Y:「救命,我要你飾演一個敗家仔呀,唔好問啦…」見到佢咁肉緊,我都唔好意思逆佢意,但我又點會係敗家仔嚟喎,有得畀我敗就話啫。
已有 0 人追稿