我怎可能是女神👸🏻獵人🏹（第一季更新至斷更為止）: 808

Queenie？！你唔係咁大整蠱呀？要我喺QQ面前扮妳條…無嘢了…我睇住佢攬住一個好高嘅姐姐，睇嚟只係撞名，咁都好少少，於是我即刻打開女性預警雷達，偵測一下呢個姐姐嘅弱點係乜，然後將啲放射性毒藥注入佢嘅身體入面。
位姐姐同我一樣咁高，留住一頭到腰嘅長髮，紮咗馬尾，髮尾係染咗非常獨特嘅閃藍色，一睇就知係一個好有個性嘅人，而前額同面側就相對地清爽，唔會有Yvonne嗰啲空氣瀏海，但係就有兩蓻長長嘅䄪穗，整體嚟講係將佢面部嘅秀氣表露無遺，雖然個樣唔係話好靚嗰種，但膚色雪白，眼精水靈，鼻角分明，一對修長嘅眉實淨而帶鈎，耳珠度就掛住兩抽下垂式嘅耳環；身型係高瘦半平嗰隻，但有少少感覺好firm嘅肌肉，唔係話瘦到見骨，對波就A到B啦。
By the way，我研究嚟做乜？都只會係生命嘅過客嚟啫，又唔會食到落肚嘅…
不過始終都係忍唔住要講，佢著住一件透黑網格紋無袖露腰背心，入面係一件鮮螢光青嘅無肩帶比堅尼…真係書到用時方恨少，我完全明白得男仔著嘅衫先叫衣服，女仔著嘅係一大堆形容詞；而佢下面就係一條超低腰白色熱褲，上低下高露咗半截pat肉出嚟嗰啲，跟手條螢光青嘅比堅尼繩飛埋出嚟，而且重透透地…總之攻擊力非常高。
從來我都相信，男仔睇女仔係會過濾走晒啲布，而女仔就係用最少嘅布遮住佢啱啱好嘅地方，不如大家一人讓一步，唔好著算啦，反正男仔會真心覺得裸體嘅妳哋係最靚。
呢個姐姐嘅feel係會用硬實力抽走你魂魄嗰種，玩就肯定玩得，差在你玩唔玩得起，有啲似Carmen溝Angel咁，再帶啲女神嘅不凡傲氣。
Q’：「咦，佢就係妳男朋友仔呀。」
Y：「係呀，佢叫做阿爽，嘻嘻。」
我：「妳好，Queenie。」對住一個陌生人嗌呢個名出口感覺真係好怪，咁我當然唔會加姐姐喺後面啦，雖然睇落個樣就知佢大過我，但我唔想死住…我個腦閃過一刻，兩個都係Queenie，如果任我揀我係咪一定會揀屋企嗰個呢？因為眼前呢位姐姐嘅魅力實在太欲蓋彌彰。
跟住一個本來坐喺花槽條桯（keng4）嘅男仔行咗埋嚟，當然係哥哥嚟㗎啦。




「阿爽…呢個名感覺好似幾曳下。」呢條友…到底係識讀唇定係順風耳，明明就隔咗三四米遠。