佢企咗喺Queenie隔籬,都幾埋下,感覺話畀我知佢哋係一對嘅,明嘅,就係因為呢一個原因Yvonne先要帶我出嚟示威。如果Queenie嘅look係爆,佢就係比較收斂同沉實,個頭唔算姿整,只係一般嘅厚身,樣就…完全無特別嘅正常,亦無乜表情,但佢話我知佢唔係呆或者內向,而係好似戰国無双入面武田信玄講嘅不動如山;佢比我高半個頭,亦都幾大隻下,一般嘅黑實,係我無信心打贏佢嗰種;上半身係一件baby milo嘅黑T,上面印咗好多隻馬騮,重有大笨象、兔仔、烏龜同八爪魚,以我僅有嘅知識都知道係牌子嘢嚟,但我相信…我身上面嘅大交叉應該贏佢一條街到…嗯。佢下半身都係沙灘褲同拖鞋,我就無興趣再研究。
G:「我叫做Gabriel,多多指教。」
既然…條臭閪叫我扮不羈嘅敗家仔…
我:「哦,如果唔鍾意可以嗌我Xavier…」
希望我嘅眼神拿捏得準確啦,現實嘅我邊有咁串…
G:「Xavier…都係一個好名嚟。」佢露出深沉嘅微笑,睇怕平時嘅佢就係咁深藏不露。
Q’:「你兩個都算係人細鬼大咯。」
Y:「Queenie唔好笑我啦,邊係唧。」一句邊係『Jack』,已經透露出佢心入面嘅反話係有幾爽…
爽到假如我可以左右逢源拖住兩條女出街…
“邊係唧,我好專一㗎,未揀定咋嘛。”


G:「真係羨慕死人,咁細個就有拖拍…」
Y:「唔再細個喇…我哋都已經升中四。」
G:「唔好咁開心,通常咁早就拍拖係為咗食多幾轉㗎咋,我都好後悔…」
Q’:「咪教壞啲細㗎啦!仆街!」再用拳頭一嘢椎落去Gabriel個太陽穴度。
睇嚟,再不羈同有實力嘅男仔,都會俾Queenie食住,想再溝新女女都無可能。
G:「唔講嘢囉,我收聲。」佢呵一呵自己個頭,雙手抱後枕,一副無所謂嘅樣。
Q’:「重要等多陣,班細嘅…有堆仔唔想等去咗cafe飲咖啡打機,有啲妹就join家長車嚟緊。」
「噢!Good morning牙,又嚟多兩個,非常歡迎新朋友仔,大概等多十分鐘到就齊人,我去捉埋班仔嚟先。」都係一個哥哥…
只係望咗一眼就留下好深印象,係一個好型嘅男仔,亦都好瀟灑,並不是扮出嚟嗰種,而係由骨子裡散發。點講好呢,有啲似hunter入面嘅希索加,面上經常掛住嘅笑容已經話咗畀你聽佢嘅資質。青靚白淨,文質彬彬,高我少少,個頭兩側鏟短,中間同前面有一個輕爽嘅造型。一件淡橙色粗直間無扣鈕開胸恤,入面一件白色背心,心口吊住一個閃閃地嘅十字架,下半身係一條米色嘅馬球褲,加條雜間銀扣尼龍腰帶,白色撞油青色帆船鞋。
OK,我認輸,男仔一樣可以著堆形容詞喺身…


然之後佢就好飄逸咁走咗,來去如風。
已有 0 人追稿