Y:「唉,每次見到佢兩隻嘢就會自愧不如…」
我:「使唔使呀…YY…妳都唔差吖。」
Y:「重好講,你頭先望住人哋個樣好似掘到金鑛咁,警告你呀,再喺人哋面前落我面唔放過你㗎!」女朋友佢…好似發惡了。
我:「知錯喇,一時忍唔住啫,實在太特別…」
Y:「你平時咁嘅衰款唔怪之得Queenie唔show你啦。」
我:「平時邊有咁…同埋我同佢真係只係朋友。」
Y:「如果我企喺Queenie隔籬,都重OK嘅,但喺亞緹蜜絲隔籬我諗真係無人會睇到我,佢實在係太搶眼,而佢條仔呢,就係叫奧丁。」
我:「奧丁…佢兩個喺game走出嚟㗎?」
Y:「你問下佢哋囉,即係Odin同Artemis。」
我:「咪玩我,人哋閃閃發光咁,我邊敢走過去打招呼喎。」剩係得條女喺度就考慮下。


Y:「唔係吖,你同佢哋有啲似,就係佢兩個都係住埋一齊嘅。」
我:「吓,兩個中學生情侶住埋一齊?!真係可以?」咪係囉,我同QQ都唔係情侶。
Y:「佢哋BB嗰陣就識㗎喇,跟住兩家人一齊移民去咗澳洲,由細玩到大,所以佢兩個既係情侶,亦都好似家人,後尾佢兩個一齊返嚟讀中學,話為咗學好啲中文喎,你知啦,外國學啲中文好廢…」
我:「剩係佢兩個返嚟?咁住邊呀?」
Y:「你使乜同佢哋擔心,奧丁屋企留咗個匡湖居單位喺香港無賣到,返嚟就當別墅用,而家咪畀咗佢兩個住,至於佢哋係入面做乜就唔好問我。」
我:「咁都得?父母唔擔心嘅咩?」
Y:「唔知喎,崇尚外國生活嘅,應該點都開放啲嘅,加埋兩家人識咗咁耐,唔會擔心佢哋發生啲乜嘢事啦,可能會唔敢散多啲。」
我:「住到咁遠,返學咪好痛苦?」
Y:「咁又未必,女嘅讀德望,男嘅讀聖言,兩間都喺清水灣道附近,而且佢哋日日的士都得啦,唔爭在同你講埋,兩間都係band 1A嚟。」
我:「好叻咩,我都可以同妳一齊讀書啦。」


Y:「唓,你好彩咋,以你以前態度讀band 3就差唔多。」我覺得神奇嘅反而係佢唔轉校。
我:「QQ講得無錯,妳真係八婆嚟。」
Y:「作死你呀!你試下再大聲啲吖…喂,唔好講嘢先,有大人嚟…」
咁多人上到船,其實都係亂作一團,有人繼續打機,有人圍住Helen姐姐,團長同Gabriel就幫手搬嘢,我有諗過幫唔幫手㗎,只不過我唔知頭唔知路就無謂阻頭阻勢啦,請不要鬧我撓埋雙手。
重點係架船都幾大下,儘管我無乜呢方面嘅概念,起碼上到船人人有位坐先,或者問我老竇會比較清楚,鬼叫無一隻叫模擬遊艇嘅game。
已有 0 人追稿