我怎可能是女神👸🏻獵人🏹（第一季更新至斷更為止）: 819

「咁多位年青人，你哋好呀，我就係你哋今日嘅船長，齊人啦嘛？齊人我而家去開船喇，接落嚟就交畀我老婆同你哋簡介啦。」係一個四五十歲到嘅叔叔，黑黑實實但中年發福，佢老婆就fit啲。
「嗱，我哋係Odin仔屋企人嘅老朋友嚟，知道你哋都係一班精乖伶俐會守規矩嘅小朋友，所以都好放心由得你哋自己玩嘅，最緊要玩嗰陣小心啲，最唔想見到你哋燒嘢食嗰陣辣親或者切到手，如果唔識游水嘅話落水記住著救生衣，著唔掂嘅話可以隨時嚟搵我。」
明嘅，做富貴子弟客，點都好過做啲MK仔客，起碼包保無人會喺船上面玩陀螺。
Anyway，兩位大人同呢個故仔係唔會有任何關係，亦都一啲睇頭都無。
A：「各位親愛嘅團員！請大家跟我嚟先！」
亞方穌哥一聲令下，所有仔仔女女都跟住佢行，睇嚟佢都好enjoy做團長呢一個職位，比起某社長有過之而無不及，而且都有氣勢好多唔係得個煩字，YY就同我拖住手跟住其他人行，落咗下層嘅…船艙…都真係好大下，個艙兩邊係兩排類似梳化咁嘅紅色位，中間有啲茶几，盡頭係一塊投射屏幕，即係課室上堂用嗰啲；嚴格嚟講，呢啲setting我覺得似夜總會，不過我未去過㗎，只係喺人中之龍入面學返嚟，然後Helen姐姐會換套兔女郎衫坐喺茶几上面跳舞，講笑…
不過呢度area就細返少少，有啲人要企喺度。
A：「Wel—come e—verybo—dy！」
佢左手叉腰，右手擺開，做咗個非常誇張嘅動作…
「夠喇！團長！我哋唔係嚟拍卡通㗎！」




「呢度唔需要火箭兵團呀！Don’t you know？」
睇嚟佢喺呢度係一個好戲劇性嘅存在，而啲小朋友都好似好鍾意佢，但就係惡攪佢嗰種；唔知佢溝女嗰陣會係點呢？應該會有第二個樣掛…
A：「大家冷靜少少先，我哋作為一個專業嘅音樂團體呢，就應該點都要做返啲相關嘅開場白…」
然後佢企喺幕前，㧻下枱上面個mon，projector嘅白光即刻射咗落佢塊面上，傻嘅都知佢開緊嘅係一個乜嘢系統，卡啦OK。
「唔好咁得唔得呀，我哋係嚟聽海浪聲，唔係嚟聽你唱K㗎！」
「咪係囉，就算聽都聽Queenie唱先啦！」然之後Queenie一面窘笑，我諗…佢應該有啲特色？
A：「請容許我recap一次，我哋係一個專業嘅音樂團體，點可以同啲凡夫俗子嘅唱K相提並論呢？」
平心而論，佢都係好多嘢講，但就唔係煩人嗰種，而似係將自己擺上枱搞氣氛，明顯比瘟神高章。
「吓，你唔係同我講呢度唱K有莫生同貝生同蕭生同韋生啲歌呀？」