我怎可能是女神👸🏻獵人🏹（第一季更新至斷更為止）: 833

我諗呢度嘅團員起碼都係中產小朋友嚟，原來癲起上嚟都一樣咁曳，但又…幾正喎。
我：「Hey！你老竇嗦茄！」
Y：「喂，你唔係諗住留喺度陪班細路嗦茄呀？」
呀妹妹，妳最多咪大人兩三年…真係當人哋細路咩…
我：「傻嘅，係都嗦妳個閪先啦。」睇嚟我都俾啲氣氛攪到high撚大晒，竟然夠膽咬佢耳仔咁講。
Y：「認真啲呀，唔想死就跟我行。」
全場黑鼆鼆，我知佢唔係豬扒，我亦都知佢應該面膿膿就嚟想殺咗我，屈服喺強權下唯有認衰仔…不過我心諗，如果堅係同佢去disco可能真係會玩到扑埋，只要我變返以前嗰副德性。
Y：「我今日攜眷出席㗎，唔該你同我好好配合。」
臨上樓梯，見到團長坐喺排凳上面，雙腳蹺住右腳搭左腳，兩隻手攤開晾咗喺兩邊凳背上面，遙望住啲細路喺度嗦茄，睇嚟佢都俾佢哋攪到好攰，不過呢個姿勢有啲似…
Y：「Hello，麥當勞叔叔。」




團長無應佢，眼都唔郁咁點咗一下頭。
Y：「嚟吖，幫我同M記叔叔影返幅相。」
然後佢就成個十分之cute咁嘅小妹妹坐喺團長嘅臂彎之下…唉，我都想有佢咁型，一半都夠，齋坐喺度都可以有女送上門。
好在平時都有用QQ部iPhone幫佢影下相，所以好順利就打燈影咗幅幾好feel嘅作品。
Y：「嚟吖，你坐去另外嗰邊一齊影吖。」
我：「哦…咁好啦…」其實我寧願陪細路嗦茄。
Y：「攞隻手指出嚟指住佢塊面吖。」
天呀！佢真係當團長M記叔叔㗎…不過團長又好似真係好玩得，全程郁都無郁過，鏡頭都唔望，然後我就伸手完成咗幅自拍，跟住同YY離開船艙。
今鋪真係大鑊，已經慣晒叫佢做YY，我開始覺得自己有啲背叛緊右女神咁。
上到去，啲女仔一如所料喺度打緊卡。




Y：「喂，幫我攞住個袋先，我去換裝。」
我：「妳著到咁爆唔係諗住就咁除嘅咋咩？」
然後，佢唔鬼理我走咗去…今日嘅我俾佢卸裝之後非常瀟灑，只係掛住咗部狗帶iPhone，而佢就攞咗個透紫嘅沙灘袋；女仔嘅袋…唔知有乜呢？M巾？condom？震蛋？但又其實呢啲對我嚟講唔算得係乜，我又唔係處男，以前一早就探索過女仔袋會有乜，加埋而家成屋女仔嘢…
我䁽到佢個銀包喺袋入面…唔知會唔會有男朋友相呢？身份證幅十一歲相會唔會好低B呢？算…雖然佢係女魔頭，但我至少都要畀返少少尊重佢嘅，就算我要發難報復都唔應該背住佢做…加埋…呢個女人啲嘢關我乜事喎，我對佢零興趣。