我怎可能是女神👸🏻獵人🏹（第一季更新至斷更為止）: 837

H：「蝦尾咁幼插唔入㗎，嚟吖，等我幫妳。」
而我腦海中竟然浮現咗Helen姐姐踎喺我上面幫我插嘅景像，明明佢就係一個咁乖巧嘅姐姐，雖然睇佢插爆兩個蝦頭嘅手勢倒係十分心狠手辣…
其實如果妹妹講一聲我幫佢煎埋都得，嚟個乾燒開邊大明蝦，就算我煮嘢食唔係十分叻應該都handle到，不過我今日作為人哋嘅男朋友唔應該搞咁多嘢。
「Helen姐姐，塊魚要點叉入去呀？」
H：「比目魚…我驚燒燒下散咗喎，有無夾網呢？」
我：「放落嚟啦，我幫妳煎埋佢吖。」
「唔該晒Xavier哥哥！」真係有家教…
煎煎下嘢食，實在係百感交集，好想同QQ嚟呢啲地方玩，但如果要自己夾錢，應該一位起碼五六嚿水，以我哋財政狀況實在無資格嘥呢啲錢。
呢個時候奧丁同阿緹蜜絲都過咗嚟，佢哋望一望啲食物，又睇下稍微有啲迫嘅爐頭；阿緹蜜絲用手掃咗兩下叫奧丁先行退下，奧丁就行咗出去甲板曬太陽同望海，而我觀察到嘅就係堆小妹妹有啲失望，係嘅…奧丁哥哥嘅上半身實在係太正，啲妹妹仔想入非非實屬正常反應，唔知蜜絲姐姐究竟係呷醋驚啲妹妹搶走自己條仔吖，定係擔心佢會俾其他女溶咗再瓜分為佢好先叫佢走。
然後蜜絲姐姐就手執四枝叉，一枝雞翼，一枝牛扒，丸同腸再各一枝，攝入妹妹仔堆入面兩隻手各打孖喺度一邊轉一邊燒；黐線㗎，係咪玩開樂器嘅人都有呢啲神乎其技，anyway，其實我都好想有人燒畀我食喂埋入我個口度，但我知呢個可能性係零呀！




諗下無謂嘢，啲食物已經熟得七七八八。
比目魚就落啲燒汁，腸仔搽蜂蜜，係堅嘅澳洲蜂蜜嚟，唔係燒烤糖漿…羊架就落小小鹽，再加啲香草，點解，我覺得自己有啲返工feel…
Charles同小公主都嚟到，公主指咗幾樣食物之後就行開咗；我心諗，傻仔開工啦，唔好以為溝女好過癮，溝著個難服待嘅有排你煩。
我：「妹妹，塊魚放多三十秒就夾起食得㗎喇。」
「唔該晒！」係純真可愛嘅女仔…
跟住我夾起自己啲食物，打咗個眼色叫Charles過嚟我呢邊，雖然我對佢無乜好感，但既然大家同是天涯淪落人，無謂要佢難做啦。
Q’：「食嘢先啦，唔阻你兩個。」講完佢就走咗去Priscilla嗰邊坐，睇嚟佢兩公婆都好驚我哋呢啲外人悶親。
我：「嗱，有妳鍾意嘅羊架喇。」我放喺佢面前。
Y：「算你啦，總算記得我鍾意食啲乜。」
我：「梗係啦，如果唔係容乜易俾你溶咗。」