我怎可能是女神👸🏻獵人🏹（第一季更新至斷更為止）: 838

Y：「係咪好驚呀，等今日散咗之後再炮製你。」
我：「嗯，好衰衰嘅啫，講埋啲咁嘅嘢，人哋怕醜㗎嘛，明知我愛妳愛到乜都畀晒妳嘅…」
Y：「咁咪乖囉，嚟吖，喂我食吖。」
呢個女人到底想點？係要玩我吖，定係刺激其他人？我剩係知我無得揀。
Y：「喂，會唔會好熱㗎，幫我吹吹先啦。」
我：「哦，可以呀，如果妳唔驚食到我口水尾…」
Y：「傻豬嚟嘅，唔食男朋友口水尾食邊個喎，惜都惜咗啦。」雖然嚴格嚟講只係嘴唇掂嘴唇。
於是我小心翼翼咁來回吹咗幾下，飄出縷縷輕煙，傳來陣陣羊香，再放喺佢個嘴面前。
我：「呀。」我已經學識唔望其他人。
Y：「喑。」佢一口咬落去再用力撕，我隻手配合佢一下拉扯，喺陽光照射下睇到有兩滴肉汁彈出，半塊肉就跌咗入佢嘅口度。




Y：「嗯…嗯嗯，都幾好味，好在你無落蜜糖。」
我：「妳知啦，平時要慳錢，好多時我自己煮。」
Y：「哈，某個女仔真係夠晒幸福。」
乜喎，妳哋有錢要食乜有乜啦，使鬼恨呢啲？
唔得，呢句係錯嘅對白，唔可以講出嚟。
我：「如果妳鍾意，我可以成日煮畀妳食㗎。」
明知無可能，明知係違心說話，但我知道呢句係今日場遊戲嘅正確答案嚟。YY一心假戲真做，識溝女嘅我當然可以配合，但有必要玩到咁咩？
Y：「嘻嘻，好幸福呀，不過呢塊羊熟咗啲。」
我：「一係試下呢塊，會無咁熟。」由於唔係用開嘅爐，我都驚會舐嘢，所以一塊放中間，一塊就放側邊，以防啲㤿憸聲悶嘅女人向我施暴。
於是我又吹吹放喺佢面前喂佢，佢又一口咬落嚟…




講真如果再咁玩多幾日真係會擦出火花，畢竟佢都算係花容月貌，內在條件又好，除咗骨子裡係個黐線女之外；但佢到底想點？要我愛上佢？咁對佢又會有乜好處…
Y：「嗯，呢塊就啱啱好，畀我揸住食啦。」
我：「咁呢塊妳重…」
Y：「你食啦，唔好搞到你剩係服侍我咁。」
我：「食完妳口水尾我實聽晒妳話嚕。」
Y：「衰鬼，你不朽都要聽晒我話㗎啦。」佢再一邊打斜望住我，用膊頭撞一撞我。
其實係咪所有有錢女都咁黐線？而屋企隻QQ平時已經係收斂咗，所以佢先同瘟神…算，唔好再諗。
Y：「我又要試下條腸。」本來諗住自己食。
我：「妳要紅色定白色呀？」
Y：「兩隻都試下吖，唔該…」於是我用枝叉拮起條粗大嘅德國腸，放喺佢嘅面前。




Y：「上次我喂完你食腸，今次到你喂返我。」
吓，咁都叫喂我食腸，唔好玩我啦…