所謂嘢飲,佢攞咗兩個冰桶,插住可樂,ginger,san pellegrino,重有最緊要嘅gold label…我心諗佢哋係咪想㨃冧Charles仔同小公主呢?YY飲咗幾杯好似都無乜反應,我以前就晚晚喺波地都有得黐嚟飲,問題應該不大。
我:「點解我唔知道我女朋友係女賭徒嚟嘅?」
擺明玩嘢,因為我本身就唔多識佢。
Y:「另外嗰件都係呀,我哋成日上Uranus屋企打牌嘅。」我記得QQ講過Uranus屋企做生意,所以或者風格比較free,又成日無人在家。
我:「連Zilvia都會打㗎?」真係估唔到。
Y:「佢對住男仔先收收埋埋啫,平時都OK。」
我:「輸咗使唔使除衫㗎?」
Y:「你理得我哋吖…問你屋企嗰件啦。」
一上到去,Queenie同YY就自動自覺埋位坐對家,好似真係好想玩咁,而我就繼續處理隻大蝦,好少食啲咁大隻嘅蝦,見到條蝦腸覺得唔多聚財就幫佢做手術拆條腸出嚟…唉,早知未熟嗰陣就挑定先,而家好鬼易斷。
丁:「我唔想蝦女仔,不如妳玩住先?」


絲:「無所謂,輸咗你找數就得。」
然後蜜絲坐咗落YY上家度。
C:「Pris,妳都識玩㗎可?」自己條女識唔識打牌都唔知,幾乎可以肯定未上過床。
P:「呵,可以嘅,輸咗唔好怪我就得。」
是但啦,唔關我事,輸贏又唔係我啲錢。
Y:「簡單啲,清章香港麻雀,三番起八蚊全辣,十二番封頂,O唔OK?」
絲:「只要唔係碰槓牌就得,最憎啲低能嘢。」
Q’:「小公主使唔使就妳打日麻?立直我都識㗎。」我夠識咯,打機日麻選擇多咁多。
P:「唔使,打返香港牌就可以。」
Q’:「咁本金兩千,有人輸晒當玩完好唔好?」


絲:「好吖,唔好打咁大,費事傷感情。」
或者…二千蚊真係唔算係乜錢,既然我件衫都過千,QQ收隻錶又五六千;嗯嗯,蝦有蝦味,唔錯。
G:「剩打錢又有啲無聊,出銃嗰隊條女要自飲一杯啦!」佢一路飲highball一路講。
絲:「我實無所謂,你問啲小妹妹啦。」
Y:「我驚你枝嘢飲晒都未打完咋。」
P:「我唔係小妹妹,飲下嘢好閒啫。」
Y:「二千蚊…一鋪大四喜就完㗎喇喎。」
C:「妳食得出先算啦,姐姐。」
吖,啲靚仔真係串串貢嘅啫,就食畀佢睇。
我:「嗱,二千蚊,隨便玩啦。」我攞個銀包出嚟,好豪爽咁夾咗四張大牛出嚟,當然啦,啲錢又唔係我嘅,唯有祝妳好運。


Y:「低B,有籌碼㗎,鬼得閒慢慢找錢…」
已有 0 人追稿