我怎可能是女神👸🏻獵人🏹（第一季更新至斷更為止）: 849

P：「如果…萬一…小妹衰咗嘅話各位哥哥會惜住我㗎可。」佢一邊㧻手指一邊講。
G：「放心啦，我絕對唔會蝦小妹妹。」
丁：「我諗…俾我摸下感覺應該唔會好蝕？唔知呢，哈哈…」佢一路摸頭一副扮傻陽光少年嘅語氣，我就覺得，公主分分鐘覺得有賺，畢竟佢嘅身形正過個啲打書生處男太多倍。
我：「我好溫柔㗎，除咗對住我條女，呀！嘩…呀…唷唷…」我隻手一摙咗上去，佢就好大力咁踩落我隻腳度，大佬…拖鞋嚟㗎。
踩傷我隻腳事少，對拖鞋好似都幾嚿水。
Y：「Priscilla唔使驚，佢唔會敢對妳亂嚟。」
P：「咁好啦，我會落力啲打無咁易輸。」
於是緊張刺激嘅第二圈就開始咗。
A：「咦，原來你哋上咗嚟打牌。」
我哋眾人望一望佢，然後又繼續聚精會神喺返張枱上面，因為真係無乜人想理佢，而且我哋亦唔可以郁動，就算幾條仔睇到上下家啲牌俾人覺得有打聾通嫌疑都唔好啦。


穌哥繼續自得其樂，行咗去公主後面，哄到塊面同張枱好近，再露出一個嚇到吃手手嘅表情，搞乜鬼？就算見到九蓮寶燈都唔使咁呀…小公主個樣有啲錯愕，但亦都開始慣咗佢神神化化嘅舉動；然後佢行咗去Queenie後面，望住副牌雙手抱頭，一副萬念俱灰嘅樣，Queenie應該頂唔順佢就彈咗佢粒lin一下，團長跟住震咗一震；之後到蜜絲攞牌，團長伸出一隻手指指住隻牌十足十見鬼咁，蜜絲又喺自己啲牌入面攞多一隻出嚟指住，團長就揮揮手say no，佢係咪想講唔可以通水，蜜絲打完牌後就又整咗個啜卟飛吻畀佢；最後團長走咗埋嚟放個頭喺YY膊頭上面睇牌，明明一啲特別都無，再一副喪屍樣咁望住我…
A：「好閃呀！閃！救…救命呀！閃死喇！盲…」
之後就連仆帶滾咁跌返落下一層…
丁：「自己攞嚟衰，明知我哋四pair喺度重上嚟攪攪震，抵你戴住黑超都眼盲。」
P：「佢無女朋友？」小妹妹有同一疑問。
絲：「妳覺得佢有無可能無女埋身吖？」
P：「咁點解佢唔帶埋女朋友嚟嘅？」
Q’：「好難講嘅，佢始終要喺度lead住同埋睇住啲細，點都唔可以自由自在拍拖㗎喇，而且帶女朋友嚟又未必適合呢度嘅環境。」
C：「又或者佢諗唔到帶邊個女朋友嚟比較好…」
P：「嗯？乜佢有好多女朋友㗎？」


C：「唔知呢，可能啦…」
絲：「呢度做佢避風港咪幾好，唔使俾啲女人看住，可以繼續神神化化，唔使服侍女人，鍾意同Helen吹水又得，同妹妹仔玩又得。」