小弟做酒樓執漏,點會未見過人醉吖,要點清理就唔好提嘞;但有一種人,醉咗係越精神,越多嘢講,越hyper,但佢其實唔太知自己做緊乜。
Y:「唔嬲喇,玩下咋嘛,起返身啦。」
我聽佢話起返身,不過既然妳今日係我條女…
問都唔問我就啜咗落佢嘴唇上面,但礙於始終唔係真,我就無伸脷嘞。
丁:「嘩嘩嘩!Yvonne要宣示返主權呀,哈哈!」
絲:「Yvonne食唔食到Queenie啲口水味呀?」
無錯,惜女朋友係天經地義嘅!
我仰天長嘯:「我最愛嘅女人係YY!」
然後,成個畫面靜咗,大概有一秒左右。
「柒頭你好嘈呀!」「Yvonne妳曬夠命未呀?!」


下面傳嚟少年嘅反抗聲音,如果佢哋喺現場睇到,睇怕會想成枝燒烤叉車埋嚟。
我望返YY,佢成塊面紅晒,由鼻哥紅到去耳根,啲微絲血管好似想爆咁;呢一下肯定係真嘅情緒嚟,扮出嚟係無可能有咁劇烈嘅身體反應…
我攬住佢嘅背脊,再摸摸佢個頭。
Y:「打…打牌啦,傻佬。」
好似,終於第一次,我成功反制返隻衰婆。
丁:「哈哈,唔得掂,笑到腸抽筋咁滯。」
Q’:「返嚟喇!要開始北圈喇!」姐姐真係姐姐嚟,夠晒老司機,Gabriel就帶住暗笑望咗我一眼。
一攞牌,咦!有四對喎,重有兩隻雙番北添,咁好手氣就唔諗喇,快刀斬亂麻嚟個雜色對對糊。
Q’:「八筒。」我:「碰!」Q’:「好趕咁喎。」
Q’:「紅中。」我:「碰!」Q’:「…。」


P:「你…兩個係咪有路㗎?」
Q’:「唔知呢,妳試下同其他男仔打下茄輪囉。」
摸咗十隻牌左右,我就已經北同萬子對碰。
雙番北應該無咁易食得出掛,橫掂head住咁多,五番糊都食住先啦,好難自摸嘅,我又唔係女仔,不過睇落我下家就儲緊索子,好可能乜都打。
正當我諗諗下之際…
我:「蜜絲,實在非常抱歉。」
絲:「喂喂喂,你係碰咋?!」
我開牌:「雙番北,紅中,對對糊,無花,七番一二八。」連我都覺得快到交關。
絲:「有無搞錯呀!唔好再快啲?摸咗十轉多啲咋喎。」
P:「重話唔益自己條仔,小心就快輸返自己出去呀。」


我:「YY,我諗而家OK㗎喇,畀返妳打吖。」
絲:「我都要換人呀!奧丁幫我贏返啲返嚟。」
是但啦,慢慢廝殺,總之我而家零壓力等收工。
唔係嘅,我都覺得幾好玩,可惜我個partner唔係真係我條女,如果…QQ望到我惜Queenie姐姐唔知會點呢?兩個Queenie,姐妹丼…
正當我夢遊緊,懶得睇佢哋打成點…
Q’:「自摸無花清一色,位位二五六,多謝!」
已有 0 人追稿