我怎可能是女神👸🏻獵人🏹（第一季更新至斷更為止）: 888*

有人話太耐唔見QQ，呢段會稍為加速。

我：「咁你女朋友有無挑戰性？」
丁：「OK咁啦，但對得太多就會悶，而家最想係打到佢屁股啪啪聲！」
我：「咪打囉，自己女朋友嚟，扑到啪啪聲都得啦。」
丁：「唔得㗎，會變咗打架，好辛苦。」
又係嘅，女朋友咁有bargaining power，你邊有得想點就點，點可以好似我以前對住細蚊咁。
A：「喂！你兩個游水定謦計呀？！」
佢同Helen兩個唔知喺邊攞咗兩把大水槍出嚟，重要係氣壓式嗰隻，不斷咁射落我哋塊面同隻眼…係呀！我俾Helen姐姐顏射呀，佢重要笑得好開心。
啱嘅，雖然我唔志在輸贏，但做下樣都要落力啲游，而奧丁佢直頭潛咗落去繼續游，呢條友都short嘅，喺水底單手潛水都可以同我一樣咁快，體能簡直好到加零一，加埋個外表，啲女點會唔心動吖。




只見前面嘅Charles仔游完一半已經放慢晒，隻手好似無力遞上嚟咁，後面嘅Gabriel已經緊緊咁貼住佢；但呢個唔係重點，死人奧丁喺我側邊打側游成條比目魚咁實在太過刺激性，好似笑緊我呢條廢J幾時會無力咁，我更加唔可以輸比你睇。
我同佢兩個越嚟越快，去到最後五十米我變埋做自由式，但就係點都擺脫唔到佢，好快我隻手就掂到陸地，然後企返起身登陸，塊大石一岩一巉加埋跣到死，所以係要小心翼翼咁行以免撼穿頭，喺我右邊嘅奧丁咁啱有兩塊尖石阻住佢，被迫兜路之下結果我最快去到中間。
丁：「死人頭游咁快嘅，早知讓你右手。」
我：「吓，讓右手會好啲咩？」
丁：「因為我係左囿嘅小朋友。」
我：「望真啲你左手手臂又真係發達啲。」
丁：「點呀，係咪好想摸下？」
我：「唔使喇，留返畀啲女啦。」
丁：「啱嘅，右手自己用，左手留畀佢哋。」…。
Gabriel同Charles亦都嚟到。




C：「呼呵…呼呵…呼呵…」佢揞住心口好似就斷氣咁，Gabriel可能驚佢行都無力喺度仆街就喺側邊傍住佢一齊行埋嚟。
A：「好！勝負已分！大家望過嚟影返幅相先！」
根本呢條友就喺度當我哋賽狗咁玩…然後再派花生等其他小朋友變得十分歡樂。我哋四個就互搭膊頭俾Helen姐姐影相，其實都幾好玩嘅，可惜我唔係屬於佢哋呢個世界，YY亦都唔會真係睇得上我，正如QQ…