我怎可能是女神👸🏻獵人🏹（第一季更新至斷更為止）: 897

Y：「得，你有錢畀㗎嘛，呀，唔好食得多過你今日贏嗰啲就得。」關鍵時刻佢重係清醒嘅，因為我銀包有成五六千喺度，食米芝蓮魚翅就綽綽無餘啱啱好。
我：「放心啦，我唔會玩嘢嘅…」雖然諗緊。
Y：「呀，重有，唔好去西餐廳，呢身裝扮唔配合。」
我：「食唔食龍蝦？」其實我都係隨口噏。
Y：「當然無問題啦，唔係小龍蝦就得。」
揸住呢嚿錢又點會食埋呢啲下欄嘢喎，當我傻嘅咩？好歹我都做酒樓，就算波龍都唔要啦；Anyway，我同佢都係入返大商場先，估計街鋪無乜啱佢。
手拖住手好自然就搭扶手電梯去到頂樓嗰層，當然有酒家啦，我就企喺門口度望一望餐牌先…澳洲龍蝦廿八蚊兩，唔好蝦我細路仔唔識計數喎！一斤有十六兩，十六乘廿八，即係四百幾，屌，足足貴咗我公司double唔止，明明咪嚟自同一個海，食海鮮又唔係好多廚工…
Y：「做乜你好似諗得好辛苦咁嘅？」
我：「突然諗起…今日都食咗好多好嘢，想食返啲簡單輕鬆啲嘅嘢。」例如學生A餐黑椒雞扒腸仔飯，唉…
Y：「哦，你話事啦。」




於是我同佢落返一層，行咗入一間新派韓國餐廳入面，主因係隔籬日本菜要等位同埋我麻麻地食魚生，而我相信韓菜都係非常適合麻煩嘅港女。我哋坐低咗喺個卡位，我諗呢度環境會舒服過酒樓嘅，加埋多後生仔女無咁多老餅，如果我唔怕死嘅話重可以昅女。
一坐低佢就手肘放枱，雙手抱腮，一副大安旨意乜都交晒畀我去處理咁嘅款。平時食韓國菜，如果唔係任食韓燒，基本上我只會食兩樣嘢，就係石頭鍋飯同埋炒粉絲，無他，因為窮吖嘛，同埋一定食得飽先；而家無咗價錢限制，個琳琅滿目嘅餐牌就變到成份試卷咁，明明係一條truth or false，而家就要我做閱讀理解。
我：「妳有無乜嘢啱心水？」
Y：「係男朋友揀畀我嘅就得。」
算，懶得理佢，就揀晒我平時想食唔會嗌嗰啲就算。
「請問兩位想食啲乜？」靚女又企理嘅侍應姐姐講。
我：「一個清湯燉牛肋肉，一個辣撈鮑片八爪魚，一塊海鮮煎餅，一set甜辣炸雞，一份雜菌炒野菜。」
Y：「愛多個細嘅人蔘雞湯吖。」
點完菜侍應姐姐就行咗去，可惜佢係著褲，無腳睇。
我：「估唔到妳會嗌人蔘雞，我以為得啲阿公阿婆先會飲。」重要係古裝韓劇先會見到…