我怎可能是女神👸🏻獵人🏹（第一季更新至斷更為止）: 906

我：「係呀，咁妳而家當我呢個男朋友係乜先？」
Y：「喂，我咁嘅姿質，又一蚊都唔使你出，有多一個男朋友都好正常呀，你哋夠鍾意左擁右抱。」
我：「係，娘娘英明，直頭應該後宮三千。」好呀，多啲玩具妳就唔使煩住我。
Y：「唔係玩呀，不如幫我諗下有無辦法？」
我：「我唔明你哋有乜好冷戰？如果真係鍾意人何必要互相折磨，如果唔鍾意嘅話又點解唔換過個？」
Y：「為啖氣啫，你當玩下咁囉，同埋考試期間我都唔得閒理佢，佢亦唔得閒氹我，唔係唔鍾意佢嘞，係嘅就一早飛咗佢啦，只係唔滿意佢啲態度啫…你唔好諗住我哋掛住女神牌頭多人追就好易換畫先得㗎，好煩㗎，又要諗下對方係乜人，係咪真心鍾意定想食女，換多幾換又俾人唱姣閪女神，而且分手唔係㩒個制delete咁簡單，大把手尾要做，你諗下啦，有錢人都唔會不停換樓啦，因為搬屋好麻煩，最後，就係我想同佢一齊。」
我：「妳成個月無搵過佢，會唔會佢已經同其他妹妹仔打得火熱？」
Y：「咁我都唔輸蝕吖，咪又係同你玩緊。」
正確啲講係妳玩緊我，而唔係同我玩緊，只係我唔算蝕。
我：「有無諗過妳搵返佢佢會咁講…欸，YY妳搵返我呀…其實都隔咗咁耐，sorry呀…我已經有新女朋友，唔好意思呀，不過我諗妳都有大把仔追…」




Y：「喂呀！」佢好似已經喊咁口。
我：「無無無，無事嘅，乖乖呵返…我只係想講，任何事都有可能性，妳唔可以諗住贏梗先得。」
Y：「我夠知！如果…我失戀…你日日都要陪我！氹返我呀！」拜託仔仔千祈唔好做負心漢，我頂唔順呀…
我：「未必嘅，如果要分手應該會攤牌先…」除非好似細蚊呢啲不負責任嘅衰女包。
Y：「咪再講呀，幫手諗下辦法先啦。」
我：「呀，佢有follow妳IG㗎可？」
Y：「梗係有啦，你係咪講緊廢話呀？」
我：「咁冷戰期間佢有無睇妳啲story呀？」
Y：「有嘅，我都有睇佢…不過無like同埋無講嘢啫。」
我：「咁就啱嘞，我哋搵啲嘢刺激下佢先，佢check得密唔密㗎？會唔會隔成日先睇到？」




Y：「唔會，通常過兩三分鐘就會出現，尤其臨瞓前。」
我：「好，咁而家就upload妳今日影嘅泳衣相上去。」
Y：「吓…真係要咁做？諗清楚未…」
我：「唔係嘅話妳諗住點？用幅羊架相嚟刺激佢？」
Y：「無可能啦，平時已經大把嘢食相。」
我：「咁咪係，就睇下妳過唔過到自己心理關口…而家啲女仔，個個都喺上面有幾多露幾多㗎啦。」
Y：「我都明，但bikini真係未試過。」
我：「凡事總有第一次，貼完就大個女㗎喇。」