我怎可能是女神👸🏻獵人🏹（第一季更新至斷更為止）: 905

Y：「好喇，可以行…」
我：「咦，真係啱啱好廿一秒，係正常生物嚟。」
Y：「你係咪黐線㗎，喺度計乜鬼嘢？」欸…主因係QQ無可避免地經常會喺我側邊去廁所，咁我好學嘅緣故就想統計下係咪男仔膀胱真係大啲可以一次過屙耐啲，後來我又發覺男仔肌肉好力啲會射得猛啲所以唔可以直接用時間嚟計算膀肛嘅容量。其實又唔關QQ事嘅，同Carmen一齊嗰陣我哋就試過鬥飲完一大枝水後忍尿，忍到無可再忍就睇下邊個可以連續唔斷殊耐啲…
我：「驚我女朋友係吸血鬼嚟嘛…嗯，妳洗咗手嘅…」
Y：「梗係洗咗手！當我係乜，好想我唔洗手咩？！」
我：「我…OK㗎，唔洗手嘅女朋友都幾刺激。」
Y：「救命呀，你唔好咁變態得唔得…」識驚喇咩？
我：「乜妳而家先知妳男朋友有少少變態咩？」
我唔理佢攬住嘴落佢粉嫩嘅雙唇，佢無反抗。
我：「咁，妳攞住咁多嘢，我送妳返屋企？」




Y：「你係咪廢話呀？咁都好意思問女朋友嘅？」
我：「欸…咁我哋去搭的士？係咪？」換完銀包我又變返個窮光蛋，但我唔介意犧牲嗰幾十蚊送佢返去嘅，話晒我今日都食咗佢咁多。
Y：「呢度同我屋企的士站都唔係太方便，落去搭MTR啦，幾個站咋嘛。」我記得QQ講過佢住喺奧海城上面啲中高產物業度，喺幾個站嘅，不過轉線有少少麻煩。
定係佢唔想咁快返到屋企？話晒拍咗成日拖我都有啲習慣，好似真係有個咁嘅女朋友都無乜問題。
我左手攞住兩大抽嘢，右手拖住YY行入去MTR站，佢一路都好正常係挨住我休息下咋，再加玩下隻Melody咁，過咗陣我哋就去到奧運站，經天橋去到奧海城唔知第幾期，再出到去一個公園，時間已經十點幾理所當然係無乜人影嘅。
唔通佢想嚟多個攬攬goodbye kiss？扮嘢都要做足全套，使唔使咁黐纏呀。
我：「YY，妳…諗住返上屋企未呀？」
Y：「不如，我哋坐低謦下欬？」
吓…我哋已經對咗成日講咗無數咁多嘢，嚟到而家先嚟謦欬？有乜咁緊要呀，佢唔係真係鍾意咗我想同我表白呀？唔得㗎，我唔係話妳唔好，但QQ喺我心入面實在太重要…
結果，我哋坐低咗保持安靜三十秒。




我：「欸，妳係咪有乜想講，再係咁會尷尬㗎喇。」
Y：「唓，又係你話對住女仔唔會尷尬。」
我：「咁靜，要毛手毛腳下我女朋友等佢發出啲嚶嚶聲咪唔尷尬囉。」我用手搭住佢大髀。
Y：「無聊。囈，你都係男仔嚟，不如問下你，有無方法唔使我出聲令到我男朋友搵返我先？」
我：「呢層…嗯，妳個男朋友咪喺妳面前囉？」
Y：「我係講另一個呀。」佢唔敢講真嗰個。