我:「吓…有乜可能…我通常大過晒你哋,都未十六。」
Y:「嗱,我話你知,但唔准同任何人講,如果俾我知道QQ知嘅話,我絕對會整死你。」
我:「可以。」我早就保住妳兩個太多秘密。
Y:「其實我唔係喺香港出世,而係喺廣州。」
我:「原來…完全唔似喎,妳港女唚味濃到…」
Y:「你係咪講漏咗個死字…不過呢,我同你哋一般認識嘅單非,雙非,假結緍嚟香港嗰啲唔同,我屋企係早期投資移民嚟香港嘅,所以早幾年重揸住中國護照。」
我:「我諗…我都無資格歧視啲新移民…如果都係講廣東話其實無乜分別啫,不過你哋投資移民係唔同啲嘅,一定係好有錢。」
Y:「傻仔,個計劃初初開嗰陣六百五十萬就可以全家落嚟,我老竇睇啱機會搞咗一大輪,京奧完咗之後生機處處就順利過咗嚟。」
我:「六百五十萬…咁樣唔係叫好有錢…」
Y:「對我哋小朋友嚟講梗係多,你望下上面,是但一個似樣少少嘅單位都唔止呢個數,而且嗰陣係直接香港買樓都可以count,咁相對上零九一零年呢筆錢係多啲嘅,後嚟香港政府加到一千萬重要唔計物業,為咗唔俾人抽秤我哋當然做返靚條數,同一般嚟香港諗住買張身份證嘅投資移民唔同,父母為咗我同阿哥好真係搬咗落嚟長住,七年之後放棄埋個中國戶籍就變成一百%香港人,咁我其實由幼稚園開始就喺香港讀,不過遲咗一年囉,所以就會大過你,加埋廣州香港講嘢無乜分別,所以你哋唔會分到。」


分條毛咩…我爹哋啲屋企人就真係返晒上廣州…
我:「好複雜…不過我諗我明嘅。」
Y:「嗱,畀張身份證你睇吖。」
我:「唔使啦,又唔係唔信妳。」叫PTGF妹妹玩就話要check下夠秤未啫,我都無咁嘅錢。
Y:「唔係呀,有啲唔同㗎!你哋張身份證係AZ,我呢張係AXN,X就係大陸出世,而N代表我改過名。」
我望住佢張身份證,張相當然係一個好可愛嘅女仔,同我同年出世但就係年頭,重有堆我從來未留意過嘅身份證字母。
我:「咁點解要改名嘅?」
Y:「因為啱啱嚟嗰陣乜都唔識,所以英文名係跟大陸拼音,後嚟我老竇發現全部香港人啲名都唔同串法,佢驚我哋俾人分到而俾人蝦,所以咪改返做香港拼音,重加埋英文名落去,除非好熟身份證,如果唔係都唔會分到。」
我:「梳das呢…Yvonne姐姐!」我偎個頭埋去佢心口。
Y:「作死你呀!唔準咁叫我,雖然係事實…」


雖然佢仍然係一個好麻煩嘅女仔,但知道佢原來大過我少少之後,我心入面竟然有啲溫馨嘅感覺。
我:「但係我姐控㗎喎。」
Y:「姐控你又咁迷QQ?!」
已有 0 人追稿