我怎可能是女神👸🏻獵人🏹（第一季更新至斷更為止）: 929

上到床之後，QQ重喺度彈緊琴，其實我又何德何能可以聽到咁多女神玩音樂，我知道自己無資格企喺妳嘅身邊…然後就瞓著咗。
咦，QQ好似嗌我起身？乜唔係放假喇咩。
嗯，好攰呀，我要覺覺豬，妳繼續彈琴畀我聽啦。
叫埋YY嚟都得，我要聽最清純嘅裸體管弦樂。
突然我坐咗起身，望一望部電話，原來已經九點半。
嗯？今日嘅我係咪好似有啲嘢做？我望一望成間屋得我一個，係喎，QQ有音樂表演，而家返去唔知重趕唔趕得切呢，不過我成日都有得聽佢彈琴…弊！Wendy嘅曲奇呀，我應承過返去食佢啲失敗品！
屙尿，洗頭洗面，擦牙，換校服，仆落去，呢啲常規動作我個腦一早寫咗外掛程式自動play；返到去十點左右，呢啲日子周度都有啲人，有先生，有同學，有家長，有畢業生，三五成群咁各散東西，都唔明教晒書返嚟做乜。
不過自由自在都幾好，我第一時間就跑去學校廚房。
我透過廚房門嘅玻璃格望入去睇下乜嘢環境，見到得Wendy坐喺度發呆望住部電話，於是就打開門行入去。
W：「呀！你終於嚟啦，我幾驚你唔知醒。」




我：「又唔會嘅，係遲咗少少起身啫。」
W：「嗱，呢度係你嘅曲奇呀。」佢遞咗一個透明袋畀我，入面塞滿好多塊曲奇，有白黃啡黑各種顏色，重有提子，果仁，朱古力嘅version，應有盡有。
我：「妳都幾專業㗎喎。」
W：「傻啦，焗曲奇係家政之中最簡單㗎喇。」
咁呢個我其實都知嘅，作為飲食業界嘅一員…
我：「多謝妳呀。」死火，明明平時我同佢都相處得好地地咁，點解今日嘅感覺會咁都追不回來嘅，結果我望住佢dead air，而佢就喺度望住我微笑。
點算，慣咗QQ同YY嘅相處模式，我已經唔識對返普通女仔，今勻真係超級尷尬嘞。
W：「我想問你隻手無嘢呀嘛，發生乜嘢事？」
我：「少少損啫，無乜事，教訓我唔好得罪女仔。」
虧我講得出無事，背面瘀到變晒色，前面重有幾塊焦喺度，範圍之廣闊令我想遮都遮唔到。




W：「希望你以後唔好再得罪女仔啦。」
佢望住我笑，我有啲不祥預感。
我：「呀，妳上唔上去睇表演，重要焗曲奇？」
W：「唔喇，如果好賣嘅話佢哋會打電話畀我叫我補貨。」係嘅，佢應該唔會特別想睇QQ彈琴…
我：「咁…我上去睇下乜嘢環境…」再同佢孤男寡女留喺呢間密室，我唔保證到有乜係唔可以發生。
W：「嗯，晏晝踢波畀心機，我到時會嚟睇。」
我：「多謝妳嘅支持，到時見啦。」