關鍵時間阿健用腳面敞高咗個波,啱啱笠過咗跳起嘅龍門,不過呢啲波係無速度嘅…喺以上呢堆嘢發生緊嘅時候,我已經斜角急跑咗廿米返到入禁區,睇住個波喺左空吊緊落嚟!屌,阿健啲腳法準咗咁多嘅!
我望住空中嘅足球,足球後面係太陽,我唔理得咁多使出一招鯉魚反艇側身倒掛,成隻右腳鏟咗上天,我乜都睇唔到!但,我掂到個波皮呀!
就係咁,我打咗個斜空翻趴咗喺度,而個波就啱啱跌咗入網內彈下彈下…無錯,我係掂到個波皮,但鞋底並無改變到個波嘅基本方向;今次,我輸咗俾傻仔健…一比一。
瘟:「喂!唔好發夢,專心啲踢。」
我:「社長…對唔住,係我睇唔到佢換咗位。」
瘟:「嗯,對面都會用腦踢㗎,我知你已經盡咗力救…」
講完瘟神就返中場開波,一切重新嚟過。
屌,啱啱撻一下痛到我吖,點解我咁苦命。
我望一望Bubble,佢對我微笑,用胸前交疊嘅右手輕輕托咗兩下對波,應該係喺度串緊我嘅大意同滑稽…如果唔係為咗傻仔健,我一早就揸咗妳對波,由我呢個小朋友教妳呢個大姐姐點做大人!睇住嚟!
接落嚟大家都好小心,瘟神同左衛不停同對方纏鬥製造機會,而我亦都好似隻女鬼咁追實阿健。


唔經唔覺時間已經得返三分鐘,我睇得出阿健已經無晒氣不成威脅;而咁啱呢個時候瘟神喺前場俾人挑咗個波出嚟,轆緊嚟我呢邊;唔諗喇,死馬當活馬醫!
我即刻助跑衝前兩步,巴廸斯杜達兼卡路士上身,諗都唔諗見個波彈起就用盡全力嚟個凌空抽射,真·石破天驚·天馬流星·華光耀劍·三千世界·麥林龍捲·鳳凰炎龍·計都羅睺·天翔龍閃·斷空光牙·生生流轉·派派邦邦·皂泡紛飛·蘇生福音·猛虎射球!
一下幾十米嘅遠射!劃破空氣向住龍門嘅方向極速飛去!然後嘭一聲撞落個網…唔係龍門網,係龍門後面安全網…
雖角度正確,但高度錯誤,我壓唔住個波結果喺龍門上方兩米直不甩飛過,我成為咗九四年嘅打飛機王子巴治奧…
兩個前鋒對住我怒目而視,我唯有舉高雙手投降,再面向觀眾席鞠躬道歉,原來做重炮手係一啲都唔易…
最衰都係啲地心吸力太細,如果呢度係木星就入硬。
瘟:「快啲返去呀!對面龍門球!」佢已經懶得鬧我…
放心,無再出乜嘢意外,完場一比一。
但,乜決賽有得打和嘅咩?
瘟神走咗去同Bubble謦咗三十秒,然後宣佈…


瘟:「抖五分鐘,加時廿分鐘,無中場休息,黃金入球制!」究…究竟…我幾時先有得抖暑?!
瘟:「用黃金入球制,我哋唔可以博,應該要以守為攻…我見你有啲攰,不如換一換人?」
「OK…我都已經無乜力射。」
已有 0 人追稿