我怎可能是女神👸🏻獵人🏹（第一季更新至斷更為止）: 951

W：「你屋企有乜問題…」佢用失望嘅眼神望住我。
的確，就算話我無呃佢，但都有好多嘢瞞住咗佢，我咁樣對一個真心鍾意自己嘅女仔實在好唔公道，好似死得不明不白咁，但如果我無執好間屋就俾佢上嚟嘅話…
但我相信佢，真心鍾意我嘅人係唔會傷害我，亦唔會傷害我身邊嘅人，而且以後都未必再會有啲乜交雜…
不如就藉呢個機會一次過同佢解釋埋，等佢安樂啲。
我：「無問題，有啲亂啫，妳唔介意就得！」
W：「好，咁我哋而家就上去啦。」佢好似有啲興奮。
我：「傻瓜！我哋首先要去買把刮刀先，妳自己遲啲都要用㗎嘛。」於是我拖住咗佢隻手行去百佳。
只係今日，我會盡我所能咁去令妳開開心心；物理上拖住一隻女仔手對我嚟講係十分簡單嘅事，但係我而家捉住嘅呢隻手仔就實在十分沉重…點可以同琴日YY隻衰手比。
重記得第一次幫QQ剃，係用爹地放喺度嘅鬚刨，當時窮到買包蝦餃都覺得大負擔，自然有乜就要用乜，後來情況好返啲之後梗係同QQ買咗把新㗎啦，特價都係五六十蚊啫，呢啲瑣事唔使特登講喇掛？
可能由於Wendy已經做足心理準備，知道結果後都無太過傷心，同我喺百佳有講有笑，最後我送咗把淺紫色嘅刮刀畀佢，重有多兩塊後備刀片。




就係咁，我哋手拖手行到去我屋企門口。
QQ應該會黐住兩個師姐，而且又換好咗衫，唔會返嚟喇掛？亦祈求佢一陣唔好無端端上嚟…雖然我做嘅所有嘢都光明正大，就算佢突然破門而入我應該都可以拆得掂。
我深呼吸咗一口氣，扭開門鎖，開燈再拖住佢入去。
我：「妳等一等先。」佢應該已經呆咗…
我入去廁所洗手，雖然QQ唔喺度，但如果佢知我敢用對污糟手掂佢啲衣物應該會俾佢咬死。
洗完手就出返去…QQ慣常放咗兩個Bra喺梳化上面，電腦枱上面有個女裝手袋，側邊就掛住咗QQ今朝換出嚟嘅校服裙，地下亦都有女仔鞋；佢住咗喺度咁耐，已經唔係執兩下就可以銷聲匿跡嘅程度。
我唔係想掩飾啲乜，一嚟啲Bra阻住梳化點都要搬走，二嚟QQ未必想其他人睇到佢啲內衣褲，三嚟我都唔好意思攤晒喺度放喺Wendy面前，所以我打開個喼放返入去。
我：「妳唔使除鞋都得，或者可以著呢對拖鞋…」
W：「呢個Bra咪係…」佢望住一個好可愛嘅紫藍色Bra…
或者佢PE堂換衫見過…又或者QQ透底俾佢認得…




我：「我朋友佢…出咗啲事，要暫時住住喺度先。」
收好啲貼身衣物，我企返起身望住佢，佢嘅眼神好似百般滋味在心頭，有好多疑問，但又唔知點開口。