我怎可能是女神👸🏻獵人🏹（第一季更新至斷更為止）: 965

瘟：「唔使咁喎，想食飯就舉手啦，啲女仔唔要㗎喇。」
「吖，我哋食唔食飯幾時輪到你幫我哋決定呀？！阿姐，呢度都要一碗！」係財政姐姐…
最後，我哋呢圍要咗四碗飯；太好，食燒味無飯，簡直就係食龍肉都無味呀！個感覺就好似仆條女唔准用手摸咁，呢種隔靴搔癢會令我極之難受。
QQ夾起一塊乳豬件，點咗少少乳豬醬，斯文優雅咁放入個口度嘴嚼，睇住佢有好嘢食，我個心就覺得好舒服。
雖然我哋琴日都各自食咗好嘢，但可以坐埋一齊係唔同啲！而且重有老細請，感謝黃藍社兩個低B社長。
由於唔係全包宴，啲菜係會不停咁上嘅，第二味係芝士焗澳洲龍蝦伊麪底；嘩！好大碟呀，而且重有兩個頭喺度，兩隻成斤重嘅龍蝦斬開一大堆確保每個人都有大啖肉食，實在太幸福；琴日覺得貴得滯幫YY慳皮，結果今晚就有得喺自己公司入面同QQ食澳龍，實在係甜入心。
而我嘅白飯亦都嚟到，我將大碗飯嘅頂批走落個細碗度，然後放咗乳豬、燒鵝、叉燒、燒腩同海蜇喺上面，最緊要潷多殼燒味汁淋落去，係完美嘅豪華版五寶飯。
Q：「低B仔嚟食燒臘飯，明明就有芝士伊麪。」
佢用枝大鋼叉捲起一大箸芝士麪放入個碗，再夾咗兩塊龍蝦肉，津津有味咁食緊。
我：「妳理得我吖。」我大啖大啖飯扒入口。




再上嘅菜有避風塘瀨尿蝦、黃金風沙鮑、豉汁粉絲蒸扇貝！好大堆頭呀，每人每樣都有一隻，瘟神社長我愛你！點解我唔一早就參加多啲學校活動喎，終於唔使再望住人哋隻碟入面食剩嘅龍蝦汁伊麪喺度憤恨。
Q：「你唔使感動到喊咁喎，隻異形蝦你唔食㗎啦？」
※※※※※
我：「喂呀！你哋成大堆仔攪到喊咁口係乜意思呀？！」
「Bubble社長，妳咪又係眼濕濕咁…」
我：「咁係因為有你哋為個社出心出力，我太感動，開心得滯咋嘛。」
「我哋夠係咯！可以為妳效力係我哋嘅榮幸嚟！」
我：「好對唔住，其實我好想落場同你哋一齊踢，可惜唔得，只可以喺側邊睇。」
「邊係呢，社長妳嘅靈魂一早已經落咗場同我哋共同進退，如果唔係點打得出呢種水準出嚟！」
「係呀，我喺場邊睇下半場都覺得超精彩，好感動！」




「嗯！第一次踢輸波都可以咁開心，多謝社長，多謝各位隊友…」
我：「邊係輸波喎！我哋贏咗個亞軍返嚟！既然咁開心，我哋今晚就嚟擦餐勁嘅好唔好？不如就去學校後面大排檔任食打甂爐？」