我怎可能是女神👸🏻獵人🏹（第一季更新至斷更為止）: 968

Bubble呀Bubble，妳點搞㗎…就算學校係白色裙妳都唔使全部都係白色米色肉色呀，明明瘟神鍾意個師妹只係中三，已經成日透紅綠紫藍黑；但係我又唔想咁招搖，等啲先生覺得我無嚟正經，做個壞榜樣帶埋啲細；加上我自己又唔係呢啲style，如果剩係出街先戴又好唔實用，咁樣好嘥錢，況且又無人睇…
其實有人睇，只不過佢哋關心嘅唔係我…
我入廁所解開自己嘅底衫褲，喺塊鏡入面望住自己對波，其實唔差吖；大得嚟又唔會話好墮塌晒，又無裶開晒兩邊，兩粒嘢都叫標準，唔會話個圈跟住個波一齊變大得好緊要；如果男仔有得揸應該會好開心？我一路摸自己一路諗，喺鏡入面睇到嗰兩粒嘢有反應企起身變長咗…
哎吔！我到底喺度做緊乜喎…做乜無端端發姣。
啲人成日話鍾意大波妹嘅男仔都係膚淺無內涵，只要有其他女仔對波大過妳，咁妳就會變得一文不值；唉，都唔知對波生得大有乜用，又阻住我做運動…
只不過我再係咁都唔係辦法。
死人爽…我好羨幕你，明知你曳，無嚟正經，唔認真，但又唔係覺得你太壞，你都唔似會去害人哋，所以Carmen佢先會同你玩，唔知你有無令到佢好開心呢？
Carmen，妳同啲仔玩嗰陣到底有乜感覺？我都好想試下，就算無男仔惜自己都可以開心下吖，但係我又唔想蝕底俾佢哋，唔通真係要好似妳咁放低自己先得？
沖完涼，打開個衣櫃望望…嗯，其實今晚都可以叫做正式聚餐，係咪要著得好睇少少呢？不過又無理由著裙㗎，只係去大排檔食餐飯…可惜攞唔到冠軍，如果唔係有六千蚊就真係食乜都得…加上除咗校裙之外平時我都好少著裙。
最後都係揀咗條修腳嘅黑色長褲，同埋白色嘅印字闊T，我呢啲身材根本就著唔到貼身T，要我喺街上面著到咁爆我會想搵窿瓹…最後，係咪要化少少妝呢？例如畫一畫條眼線…哎吔，好煩呀！點解做女人要咁麻煩！都唔明啲女神係點生活…




※※※※※
黐線㗎，唔止有海鮮，重有百花釀蟹鉗，脆皮炸子雞，紫蘿咕嚕肉，黑椒和牛粒，西蘭花脆蚌，蟹茸扒豆苗…
沙嗲金菇粉絲肥牛煲？邊鬼個咁識食，將全包宴嘅精粹結合埋大排檔小菜嘅風味，最重要係無蒸魚！堪稱完美。
隔籬枱…大家都可以想象得到踢完波嘅大男孩圍埋一齊就好似水滸傳入面嘅飯枱咁，而我哋呢邊有男有女就比較似紅樓夢，瘟神呢啲偽君子要顧住型像唔可以食得太擒青，反之財政文書姐姐就食得更豪放，而我亦都唔使爭住搶嘅，密密手不停食長期作戰先係最大化胃容量嘅正確之道；至於QQ我當然唔使理佢，喺屋企佢成日都見住我五分鐘清完一盒燒臘飯㗎啦。