食食下瘟神走咗過去隔籬枱同啲隊員串枱子,細細聲講大大聲笑,睇怕就無乜好嘢,九成講女啦,串串下佢又行過嚟我張凳後面打攪我。
瘟:「爽爽,可唔可以幫我手整幾枝啤酒嚟?」
我:「欸…請問我可以點幫你?」
瘟:「你咪扮嘢,我知你有喺度打工。」
我:「吓,唔係掛,咁都知?我都無撞過你。」
瘟:「呢度咁多人,總有人見過你,你邊認得晒全校咁多學生喎。」又無乜嘢嘅,返parttime又唔係壞事。
我:「幫唔到你喎,不可售賣酒精予未成年人士。」
瘟:「佢哋有個升中六夠十八歲㗎喇,幫幫手吖,你話過唔會托手踭㗎喎。」真係屌出聲,咁都…
又無理由唔幫佢嘅,而家啲細路仔真係好鍾意飲酒,見到琴日船P班死靚仔就知啦,相反我早就厭倦咗。
我:「馬叔叔…佢哋有個話已經夠十八歲,可唔可以賣啤酒畀佢哋呀?」


馬:「咁夠十八歲就可以買酒㗎啦,至於佢要請其他人飲我控制唔到,你見平時啲一家大細嚟食飯,咪又係成日畀啲仔女試下飲,適可而止囉。」佢好冷靜咁講。
我:「咁我幫手攞幾枝畀佢哋啦。」
馬:「阿爽,你同佢哋慢慢食啦,唔使急,你哋都應該十點前散場,之後你先開工執嘢就得。」
我:「係嘅,多謝馬叔叔!」
就係咁,我喺雪櫃攞咗三枝藍妹同一疊杯畀班野獸,瘟神即刻開嚟幫佢哋斟酒。
瘟:「師姐,我諗妳哋頸渴㗎喇。」
「放低啦,蠱蠱惑惑咁。」
瘟:「師妹,今日咁開心,點都要啤啤佢。」
Q:「哦,好嘅,唔該晒。」佢無反抗。
瘟:「阿爽呢?」


我:「客氣,唔使喇,我飲茶就得。」
可能因為係我幫咗佢,佢今次最順攤無強我所難。
唔係我唔想領佢情,只係琴日先飲完啲咁美好嘅嘢,實在唔想再掂啤酒。而啤酒呢,最緊要趁凍飲,有啲汽泡喺度飄飄下倒落口先舒服,如果唔係就同漱口水分別不大。
「Cheers!」三位靚女碰杯,而且唔係淺嚐而係飲咗一大啖,然後QQ放嚿咕嚕肉入口。
Q:「做乜望住人哋?」佢質問我。
如果無記錯,我係第一次見佢飲酒。睇返琴日YY嘅表現,都可以推測同佢friend嘅QQ唔會唔飲得酒;但望住QQ飲酒又好似得意啲,始終QQ細過YY,就嚟十五歲嘅女仔飲酒實在好可愛。
我:「妳得唔得㗎?我驚妳醉喎,呢度無人送妳返屋企。」其實瘟神一定會送,問題係我要阻止呢件事發生,而且QQ屋企唔應該喺呢度。
已有 0 人追稿