Q:「你少擔心啦,我喺屋企係飲香檳。」
OK,我收返QQ飲酒好可愛呢句發言。
佢唔係話以前,因為所有人眼中佢重係一個富家女嚟。
我:「有無咁過份呀…」
Q:「屋企人開咗一枝好多時飲唔晒,香檳唔擺得,所以我中一已經攞嚟飲。」
簡單嚟講,女神係叫我收皮,酒精只可以發揮效用喺細蚊呢啲傻妹身上;對住QQ同YY呢啲,我係唔使指擬借醉行兇,分分鐘我飲到雞雞陣亡佢哋都重係咁清醒。
瘟:「食到咁上下,我諗三位靚女係時候奬勵一下我哋社球員嘅精彩演出,大家話係咪呀?」
「係!不過我唔使人惜,我負責食花生!」
「我已經有女朋友,咁樣會唔會唔係咁好?」
「唔緊要,佢哋都應該有仔,其實好公平。」


「我係唔會獻出我嘅初吻畀佢哋嘅!」
「收皮啦!死毒撚!」
「如果抽中咗有無得揀㗎?係咪先到先得?」
瘟:「大家稍安無躁,呢樣嘢係交畀三位女神抽。」
財:「死人會長!你係要擺我哋上枱,你因住嚟呀下!」
瘟:「唔好咁啦,難得今日大家咁開心,我哋社嘅成績實在有目共睹,希望幾位可以報答一下啲隊員。」
財:「咁快啲啦,唔好嘥時間講廢話!」
原來係堅嘅,比賽前嘅打氣說話,嚟到呢刻終於要實行…
唉,QQ…雖然我諗惜一啖對佢嚟講唔算得係啲乜,就好似琴日嘅YY,Queenie姐姐咁,但始終要我喺佢面前睇住佢惜其他男仔,實在係唔太好受,而且係一個無嚟挐更嘅男仔。
瘟:「嗱,呢度有九張紙仔,寫晒咁多位隊員嘅名,不如就由財政姐姐嚟開始抽先。」


「隊長,我有個問題,明明我哋有十個隊員,點解會得九張紙仔,係咪有人得罪咗你俾你抽起咗?」
「唔係,咁我亦作為社長,放埋落去好似有啲公私不分,所以係無我喺入面嘅,唔信嘅話你哋可以check下。」
然之後啲隊員議論咗一陣。
「唔得,無隊長你嘅英明領導,我哋又點可以取得佳績呢?你一定要放返自己個名落去!」
明明上場就爭波射,贏完之後就幫人戴高帽,呢個係乜玩法?不過又啱嘅,其實大家都知道係玩,所以重點唔係自己有無得俾女惜,而係睇人過癮食花生。
瘟:「既然你哋咁盛意拳拳,我都唯有從善如流…好,作為紅社今年嘅最後一個節目,就由我哋嘅財政打響頭炮啦!呢度有十張紙仔。」
「YoYo!」「嘿!到底花落誰家呢?」
已有 0 人追稿