我怎可能是女神👸🏻獵人🏹（第一季更新至斷更為止）: 972

文：「社長好可愛呀！等我幫你兩個影幅相留念。」
影相機會攝人魂魄，靚女嘅一吻都可以喪人心智，瘟神就好似俾人揸乾咗咁坐喺原位。
「哈哈…哈…」大家都喺度食花生食得好開心，但奈何呢兩位師姐嘅還擊力實在太強，佢哋都唔敢笑得太大聲。
財：「到妳抽卡喇。」眾人內心糾結…到底應否期待…
文：「真係要㗎？我會怕醜㗎喎。」真係搵鬼信。
財：「梗係啦，妳要陪我㗎嘛；你哋可以放心喎，文書佢溫柔過我好多。」
文書打開咗一張紙仔，係個中五前鋒。
「啱你喎！你唔係鍾意咗人哋好耐㗎喇咩？」
「喂！喂喂喂！唔好亂講喎！」
「邊有亂講，你中四嗰陣同佢坐都不知幾開心。」




「咪係，日日叫春咁，調完位之後就變返隻喪屍。」
「邊…邊係，普通隔籬位friend咋嘛…」
無論點樣，佢都已經俾佢啲死黨推咗去文書姐姐前面。
「妳…妳好，好耐無見。」
然後，文書姐姐用一個水汪汪嘅眼神望住佢。
「順便表白啦！勇敢走出去！」「係男子漢就去馬！」
「欸…唔好理佢哋，班友剩係識亂噏。」
文：「嗯…唔好表白呀，因為…我有男朋友㗎喇。」
「我知呀，放心，我唔會做傻事。」
文：「咁…你係咪唔鍾意我呀？」




「吓…唔會呀，妳係…好女仔嚟。」
文：「我記得你中四嗰陣話過我人見人愛嘅，嘻嘻。」
「係？有咩…我自己都唔係好記得。」
文：「我有男朋友，佢應該唔准我惜其他男仔，所以…」
「咪係囉，所以唔使啦，都唔知做乜搵啲咁嘅嘢嚟玩。」
文：「但係，你喺球場上面咁努力踢波，都值得奬勵嘅，我唔可以惜你啫，但如果你惜我，我就控制唔到喇嘛。」
「可以咩…會唔會唔係咁好？」佢已經面紅晒。
文：「你覺得鍾意我咪惜囉，如果唔係就算啦。」
呢個時候，一頭長髮嘅文書姐姐已經撥開啲偏陰，將佢雪白嘅面珠墩露咗出嚟，前鋒哥哥已經騎虎難下。
「咁…失禮晒。」佢攞張紙巾濕咗小小茶，仔細咁抹乾淨咗個嘴唇，輕輕咁印咗落文書姐姐塊面上。




文：「其實你都幾好人，不如暑假…我哋一齊溫下書吖？」文書向佢露出一個好甜但唔尷尬嘅笑容。
「可…可以呀。」眨下眼佢就變到呆下呆下飲完迷湯咁，塊面重紅過馬騮屎窟，好明顯已經俾條女收服咗。
「返嚟啦！」「無用！男人之恥！」「抵你俾女玩！」
佢已經無能力反擊，保持安靜咁坐低咗喺度。
瘟神講得啱，呢兩條女真係唔掂得，生理心理都係女神級數，而且中五嘅威力又會高過中三嘅QQ佢哋。
瘟：「咁…到妳喇，Queenie師妹。」見到佢成面唇印同埋隻咖喱雞，QQ不屑咁望咗佢一眼。
Q：「嗱，幫我拆埋啦。」佢隨手擸咗張交畀瘟神。
唉，算啦，唔好望，唔好諗，我又唔係佢邊個。
佢都惜過瘟神，佢會同條仔上床，佢會直播啲肉畀金主睇…至少佢唔使再蝕俾瘟神先，因為條友已經中咗。