瘟:「中奬嘅得主係…阿爽。」
「唓!唔好玩嘅!」「唉,有無搞錯…」
Q:「喂,唔好郁…得喇,搞掂,無嘢睇,大家繼續食飯!」QQ以迅雷不及掩耳嘅速度捉住我塊面啄咗一下,然後又準備夾著豆苗嚟食,太好喇,唔使蝕。
雖然咁樣好無感覺,而其他觀眾就更加不滿。
「喂,你哋唔係咁就算呀,唔啱規矩喎?!」有份策劃呢場鬧劇又唔使置身其中嘅花生友副社長出聲喇。
Q:「咪惜咗囉,中奬嗰個都無投訴,就咁話啦。」
「如果…妳男朋友叫妳惜佢,妳咁樣惜,妳覺得會唔會鬧分手吖嗱?」真係世途險惡…
Q:「佢敢?!無得佢揀呀!」
我:「係囉,我又唔在意,由得佢啦。」
文:「咁既然得奬嗰個話唔在意,不如我哋重抽咯!」


估都估唔到,睇落斯文嘅會咁樣補一刀直插要害。
QQ聽到身邊嘅師姐講句咁嘅嘢當場打個突!
我:「唔係唔在意!只係呢啲嘢無得迫…可以俾女神惜啖,應該係無數男仔嘅夢想嚟。」我挺身迎救。
財:「係囉,師妹妳恃熟賣熟,蝦妳個朋友仔,我哋都睇唔過眼,而且妳咁樣偷雞法好唔畀面我哋喎。」
拜託…唔係個個女仔似妳兩個可以喺眾目睽睽之下玩仔樂在其中㗎,妳哋咪又係蝦啲男仔…
Q:「咁…我正正經經惜返一啖囉。」
文:「唔得呀,妳頭先曳,所以要罰,不如就嘴對嘴惜啦,妳朋友仔都話係夢想嚟!」
財:「係囉,大家咁friend,有乜所謂喎。」
瘟神心底入面鍾意QQ,點會想睇到佢同我嘴嘴,但係佢自知無能力阻止到呢兩個女魔頭生事,而且一眾花生友都非常期待,好難出聲撥大家冷水…而我相信佢哋要QQ同我嘴嘴亦係想順便惡攪埋瘟神。
Q:「就係friend…先唔係幾好吖嘛…」


文:「咁你哋係邊種friend先?好朋友?定普通朋友?」
財:「如果係好朋友嘅話,應該做完任何嘢都唔會影響友情㗎喎,除非你哋唔係真心好朋友啦。」
文:「哎吔,唔係個個好似妳咁鍾意同好朋友做任何嘢㗎喎。」文書姐姐嘅甜笑真係恐怖。
財:「妳唔好屈我喎,我都不知幾清純。」
文:「咁如果只係普通朋友,惜完覺得尷尬唔想再做friend嘅話咪斬纜囉,無乜蝕啫。」
Q:「咁…咪惜囉。」明明惜過咁多次,佢竟然怕醜。
我望住佢,佢又望住我,感覺有啲奇怪。
「嗱,唔可以掂一下就算㗎,要望住對方,我會幫你哋倒數五秒。」副社長又出手…
我同QQ一齊向前挨,直至嘴唇掂到嘴唇,好軟…
QQ塊面開始紅,桃唇傳嚟佢嘅體溫,隔空都聽到心跳聲…


「五…四…三點一四一五…九二六呀…」已預咗佢玩嘢。
「阿爽唔准伸脷㗎!」「揼扁你呀!」
明明我同YY就乜都無,但琴日可以喺船上面惜到如入無人之境,相反而家同QQ…感覺好奇怪,我望住佢對眼,完全睇唔到佢諗緊啲乜。
已有 0 人追稿