我怎可能是女神👸🏻獵人🏹（第一季更新至斷更為止）: 997

蚊：「嗯，多謝Queenie姐姐。」
我：「咁我而家送細蚊返屋企啦。」橫掂衫都未換。
Q：「咁就梗㗎啦，你唔係要人哋自己一個夜鼆鼆返去呀？」唔會嘅，雖然我知細蚊早就慣晒。
然後我哋兩個即刻出門口，細蚊就拖住咗我隻手。
我：「咁樣…會唔會唔係幾好？」
蚊：「你當拖住細妹咪得…如果你覺得背叛Queenie嘅話咪算囉。」又未至於，否則YY一役我已經可以切腹。
兩棟樓嘅距離，話咁快就到咗佢屋企樓下。
蚊：「多謝交叉仔你救咗我呀。」佢抱住咗我。
我：「傻啦，我都做唔到啲乜，妳多謝女神就得。」
蚊：「唔係你識到佢嘅話，又點會有人幫我喎。」




我：「呢個就純粹係好彩，我邊有能力識到呢啲女仔…」
蚊：「咁你又…算啦，唔講住喇，橫掂聽日都會見到你，Queenie約咗我十一點過嚟搵你。」
我：「吓…搞乜，去買衫我過嚟接妳去搭車咪得。」
蚊：「我上去先喇，記得瞓夠聽日先有精神去街。」
我：「妳先至唔好咁傻豬半夜起身清體力呀！」
蚊：「係喇，我會戒…」然後就入咗去。
然後三分鐘又返到屋企，QQ睇緊本暑期作業。
佢應該同細蚊謦咗好多嘢，想問下佢又唔知點開口好。
Q：「快啲去沖涼先啦，好夜喇。」
沖完涼出返嚟，我哋熄燈一齊上床…當然係分開床啦，唔好幻想佢會成日走上嚟我張床，我都唔會晚晚J佢啦。




Q：「我想講細蚊情況都幾嚴重下。」
我：「咁就梗㗎啦，本身又唔係叻，平時又無乜讀書，間學校又咁嘅款，考乜返嚟已經解釋一切。」
Q：「我問過佢英文有幾多分，佢話三十幾，但我發覺佢嘅程度可能得四年班左右，份卷應該好淺，如果喺我哋學校可能要攞廿分都有啲難。」
我：「類似啦，我哋呢啲讀書成日都無能為力…」
Q：「佢tenses剩係知過去式要加ed，去到have has had，do did does呢啲已經搞唔掂，唔好講最常見嘅四式。」
我：「唉，我都唔係好得去邊，識高went肝㗎咋…」
Q：「咁come呢？」我腦海得cum cum cumming…
我：「Come came comen？」
Q：「Comen你個頭，咁使唔使com埋women呀？」
要，當然要，做女人點可以唔cum？




我：「唔記得呀，考之前有溫，而家唔記得晒喇。」
諗起都大鑊，eat ate atten？take took…屌！
Q：「你都死得㗎喇，學英文係為咗同外國人溝通，睇得明佢哋寫嘅嘢，唔係剩係攞嚟考試合格㗎。」
我：「知喇，我會慢慢學，以前我都成日唔合格。」
Q：「重有佢啲數學，代數差唔多完全搞唔掂，括弧落錯晒，加減乘除調亂晒次序，通分母都唔明，係得圖形面積嗰啲攞到下分，同埋剩係識靠計數機計數，既然你數學都可以幫到下韻婷，就更加應該可以教到細蚊，喂，叉仔…」對唔住，本來我重係靠住微弱嘅光線望住對面床右女神清秀嘅面孔，但帶住疲累身軀嘅我塊眼皮逐漸咁變得唔爭氣，QQ嘅聲音就變成催眠曲。