我怎可能是女神👸🏻獵人🏹（第一季更新至斷更為止）: 998

蚊：「早晨！起身喇，交叉仔！」QQ已經放咗佢入嚟，坐咗喺我張床上面滾攪緊我。
我：「早晨…細蚊…妳爹地佢無乜點呀，佢今日放假？」
蚊：「無嘅，我話出嚟搵師姐溫書，佢無理我。」有時有啲嘢，唔理好過理，Carmen講得啱，就算點樣勸細蚊佢嘅第一次都係會俾仆街仔呃走，所以佢寧願經手嗰個係有啲人性嘅我…打鬧係無用，唔會令到一個人學識讀書。
我：「咁妳隻腳有無好返…啲？」佢著咗條類似童裝工人褲嘅米色長褲，應該係想遮住啲傷痕；啱嘅，如果我拖住成腳傷嘅佢行街俾周街啲人望住都會唔多自在，唔知啲人諗乜㗎嘛；至於美觀度就…不予評論。
蚊：「無咁痛喇，你睇下Queenie幾靚女。」
我：「佢日日都係咁㗎啦…」喺度化緊妝，有著衫褲嘅。
蚊：「你點可以咁講㗎，人哋咁畀心機扮靚。」
我：「咁我覺得真係差唔多吖嘛，佢本身咁靚女，又使乜靠偽裝個樣呢？」咁樣算唔算叫做讚佢？
Q：「我都想素顏㗎，不過慣咗…」咁妳對住我又叫乜？
我：「妳使唔使望住條眼線皺晒眉頭咁。」




Q：「唔係哩，好似唔對稱呀，但如果抹返走又好麻煩。」佢望住塊鏡以為自己係黑魔后咁款。
我：「得啦，嗰半mm無放大鏡睇唔到…」其實呢，我就覺得男仔鬼得閒留意妳條眼線，係都擘開妳大髀鑑賞鮑線啦，直頭要烏埋去索，算，唔講。
Q：「希望啦…細蚊，妳過嚟吖。」
蚊：「嗯？Queenie，做乜呀…嘩！」QQ突然攞住枝唇膏搽咗落細蚊個嘴唇上面。
Q：「企定…唔好郁，細蚊妳有無試過化妝呀？」
蚊：「有…試過下嘅…化咗都唔靚㗎啦，所以咪算。」
Q：「唔緊要，當俾我練習下呀，好快㗎咋。」
搽下唇膏，上下粉底液，隻眼又畫下，搞咗十分鐘到…
Q：「得！睇下合唔合格啦。」佢畀塊鏡細蚊。
蚊：「好似，靚咗少少。」佢連塊面都紅埋。




Q：「好，咁扮完靚靚你哋兩個可以去拍拖喇。」
蚊：「邊…邊係喎…Queenie，我同佢兩個…已經唔係…」
我決定保持沉默，成屋女人注定講多錯多。
Q：「嘻嘻，拍拖，又唔一定係男朋友同女朋友嘅專利嚟嘅，男仔同女仔，就算朋友一齊去玩或者行街都可以叫拍拖嘅，唔通…未追到手之前就唔叫拍拖咩，就算兩個女仔行街都可以叫拍拖㗎。」QQ幫佢打圓場。
口才好嘅人，講任何歪理都可以咁動聽，尤其係女仔；即係話佢哋四個女神成日一齊去拍拖啦，而平時QQ同我出街一樣叫拍拖，可以拖手，可以惜惜，係咪咁？