我怎可能是女神👸🏻獵人🏹（第一季更新至斷更為止）: K2

試完鞋，我哋就要諗辦法買夠七件有用嘅嘢…細蚊揀咗一條牛仔褲，一條legging，兩件T，一件入膊運動露腰背心，佢話唔好意思得佢買，所以我就是但攞咗件特價T。埋單七百幾，唔可以話小數目，但有咁多嘢算係咁啦。
我：「咁大袋嘢，不如畀我幫妳搦？」
蚊：「唔制，買嘢嘅感覺好開心，我要攞住自己啲嘢。」
呢個細路女，真係服咗佢，但睇到佢開心就乜都抵返晒。
蚊：「不如我哋入去玩具反斗城睇下！」
我：「好呀！」當然好，因為我都係小朋友嚟。
首先，我哋要嚟返場塑膠恐龍大戰鯊魚…
然後，幫兩隻啤啤熊毛公仔交配繁殖後代以免斷貨…
跟住，去部BB電子琴度彈domimi，misoso…
我：「睇下，呢度有minions呀！」就係班女神出街會無聊係賣物機抽蛋嘅六十九蚊popmart公仔，屋企都有兩隻。




蚊：「唔鍾意隻黃黚黚嘅低B藥丸機械人。」
呢下實在係估唔到，明明QQ出身上流屋企，都鍾意呢隻嘅嘢，重要記得晒佢哋啲名，反而細蚊就唔鍾意，女仔嘅愛好真係好難預測。同埋我想講，minions擺到明就唔係機械人嚟㗎啦，只要你睇過佢哋嗰個性感嘅屁股。
蚊：「我鍾意呢個，Molly。」佢指住一個黃色頭嘅女仔，坐喺一架鐵皮車入面，可能連埋架車仔所以要貴啲，要一零九蚊；呢個女仔個樣睇落串串貢咁，應該幾難服侍，係咪即係話港女都會鍾意返自己咁？
我：「咁，不如買一盒抽下？」
蚊：「真係得？」佢用疑惑嘅眼神望住我。
我：「玩具有價有市，如果抽完唔啱咪放出去，都係蝕十零廿蚊啫。」例如我㗎lego跑車，變咗風筒同keyboard…
蚊：「多謝交叉仔！希望係鍾意嘅款啦。」
於是我就攞咗盒上手，被害妄想症咁搖一搖確認個shape係比較結實同埋墜手，就攞去收銀處埋單；途中見到啲minions lego，當然當睇唔到，如果我真係咁鍾意早就上拍賣app收咗返嚟啦。
出到門口，細蚊已經急不及待咁打開個盒。
蚊：「咦，Molly個頭係粉紅色嘅？」我望咗一望，就連架車都係粉紅色，我覺得顏色呢家嘢同女仔底底一樣啫…




我：「唔同款咋，我覺得幾cute吖。」
蚊：「明明其他幾款都係金毛嚟…我問你吖，如果你抽minions抽到隻綠色嘅你會點？」