我怎可能是女神👸🏻獵人🏹（第一季更新至斷更為止）: K1

而我亂打亂撞可以同到唔同嘅女神食飯，喺酒樓返工又見盡食客百態，慢慢就學識咗唔同人嘅世界可以差幾遠。
細蚊一向就唔大食，不過佢今次就差唔多食晒成份，我哋重互相交換咗啲嚟試，其實佢嗰個係抵啲嘅，泰式濕炒河只係濕抄牛河換咗肉片，加多兩三塊魷魚草菇。食完飯我哋就繼續做正經嘢，於是我又打開QQ嘅行街說明書。
唔好諗QQ呢刻做緊乜，佢開心就得。
呢度好多outlet㗎，不過啲女人名牌就可以skip晒佢，睇返御三家就得，即係Nike，Puma，Adi…建議你睇晒三間先決定買啲乜，入到去你就明㗎喇。
喺呢個世界，除咗最聽媽咪話之外，我最聽嘅就係QQ話；入到第一間我就明白了，啲貨本身係有折，半價到九折不等，買滿三件額外八折，五件額外七折，七件或以上額外六折；QQ教過我計，如果折上折嘅話乘埋就得，即係七折再七折嘅話就係四九折。而我哋無可能間間都狂掃，所以係要睇晒邊間有佢最鍾意嘅item，然後再喺嗰間整個最抵嘅購物清單出嚟，細蚊咁耐無買過嘢，要買七件的確一啲難度都無，只要我埋得起單。
而佢，可以喺大商場行街已經好開心，開始逐行逐行貨架，逐間逐間鋪咁睇，我就梗係乖乖跟住佢。我本身唔太鍾意打扮，喺度購物慾不大，如果喺steam store或者模型鋪我諗我會大鑊啲，加上經過YY一役，我深知呢啲牌子嘢只係整色整水，無個可以用嚟炒嘅交叉掛喺背脊，其實你甚麼也不是。當然對於細蚊嚟講，呢度啲嘢好實用，一件T恤折完已經around一百，再折即係六七十，價錢可以媲美街邊貨或uniqlo。
蚊：「我鍾意對鞋呀！」係一對色彩比較繽紛嘅波鞋，粉色加閃面即係珍珠色系，至於係邊間嘅出品我就唔講嘞，呢度從來唔賣廣告㗎嘛，係咪？我就唔信會有小朋友跟我去食大記鐵板或者M記唔同形狀嘅免治雞塊。
我：「諗清楚係咪鍾意先好喎。」始終鞋比較貴。
蚊：「嗯，我鍾意個顏色，同埋明明佢斷晒碼，但係就偏偏有我個碼。」
我：「咁係因為妳隻腳細，有幾多女仔會買妳個碼…」




蚊：「乜喎！你咁都要借啲意笑我。」
我：「無笑你，我想提妳重爭童裝未睇。」
蚊：「你重講！」佢舉高手搣我塊面。
我：「唔講！唔講…妳鍾意就得啦。」
蚊：「不過…我怕你會覺得貴，鞋貴過衫…」
我攞上手一睇，對鞋原價盛惠千一…本身做緊半價五百五，再有六折就係三百三，其實好抵；今時今日買對yasaki都要百五啦，而且可能著唔夠一年就打柴。
我：「無問題，妳叫店員攞畀妳試啦。」
蚊：「好嘢！多謝交叉仔！」