【代糖故系列】《她被寄宿到屋邨男孩的家中》: K39

健：「頭呢段都係斜路嚟。」阿健望一望嚟後面。
QQ即刻縮返開隻手，睇嚟佢係鍾意貪玩同偷情嘅感覺；又係嘅，如果唔係佢做乜要同我攬攬惜惜喎。沿住斜坡慢慢升高，側邊嘅九龍景色變得越嚟越開揚；本來只係望住山腳間幽靜寺廟，到望晒黃大仙竹園鑽石山，漸漸彌敦道朗豪坊西九對面海IFC都出埋嚟；我諗，呢個景色咪又同QQ以前屋企望出去差唔多，越行就越覺得香港非常之細粒，其實無乜必要搭車，只要有對腳就邊度都行到。
我：「係咪呢度行上去？」我望住塊路牌，指住無盡嘅石級，正常嘅，唔通車路行到上山頂咩。
健：「係，但咪住先，我哋過隔籬望一望。」
Q：「嘩，有個涼亭呀！」望望頭頂寫住獅子亭。
呢度望出去，飽覽全九龍景色，大概由九龍灣掃到青衣。
Q：「啱嘞，幫我打卡，今次有功課交。」
其實做女神都好攰下，每每做完某啲嘢就要貼相再加幾句圖文不符，然後成日留意有無人like同stalk，已經未計化妝，擺pose，執相，加裝飾一大堆麻煩嘢。
有咗幾次經驗，我影呢啲呃like相都越嚟越熟手。
我：「你幫唔幫Kuromi影下呀？」




健：「我…邊識喎，你嚟啦。」有靚女畀你練習都唔珍惜，遲啲真係要幫女影你就雞手鴨腳㗎喇。
Q：「哎，影唔影到我屋企㗎？」
我：「妳想講妳以前屋企定而家屋企先…」
Q：「兩度都影晒咪得囉，咪咁多聲氣。」
我：「影到ICC咋喎，乜ICC住人㗎咩？」
Q：「ICC點解唔可以住人？上面係Ritz Carlton嚟㗎，隔籬嗰啲咪我以前屋企囉。」阿健個樣一面無奈。
我：「咁妳試下用手指掹走棟ICC啦。」
一路玩一路影，點計QQ都係可愛過YY好多…
Q：「難得上到嚟，你哋又使唔使影相留念呀？」
我：「我…同佢影？」本身我唔係特別鍾意影相，尤其自己細個成日一個人就更唔想影，就算影我都只會想同我嘅屋企人QQ影，不過我知道佢好避忌。




健：「好似唔係幾好，我怕影響市容…」
Q：「算啦，你哋都係唔好影，萬一俾啲有心人發現我哋喺相近嘅時間都行過獅子山就唔係幾好。」
健：「咁影完嘅話過嚟呢邊士多吖，有嘢食㗎。」
每次去到山長水遠都總會有士多，又係一間用鐵皮搭棚而成嘅屋仔，叫做恒益商店，比起南丫島嘅唔知阿婆定阿嫲豆腐花更加有規模，一樣嘅就係呢度都係主力賣豆花，十三蚊碗，好似價錢都差唔多添，唔通係競爭對手嚟？
我哋坐低就一人嗌咗一碗凍豆花，邊個話行山唔使錢？
我：「點解次次郊遊都會有豆花食嘅呢？」
Q：「因為個天畀機會你…請我食…豆腐…花。」