【代糖故系列】《她被寄宿到屋邨男孩的家中》: K78

轆下轆下電話之際，俾我見到啲QQ一定用得著嘅嘢，而且亦都係我能力範圍之內，但送樣咁嘅嘢又好似…不過都睇下先，二手網嘅嘢唔一定平，所以要check下官網正價，嗯…都有六至七折喎，而且重係水貨全新；為免遇到騙子，重要睇佢有無認証，交易次數好評量同埋頁面規模；全部都正正常常重有五百幾個五星好評，comment亦都有講佢賣嘅係正貨…乜話？有店面喺深之都？！
近到咁無理由唔去睇下嘅，深之都好犀利㗎，有兩間好多人話係黑店嘅電話鋪，但就永遠有人排住隊幫襯，呢個都唔知係乜邏輯嚟；重有間長期無人看鋪賣獨角仙嘅鋪頭，我好鍾意隔住塊玻璃睇啲大牛龜食啫喱，睇真嘢好過玩甲蟲王者啦。
我：「請問…係咪有呢樣嘢賣？」我踩到上去好好彩有人，指住部電話問佢，我諗佢都唔expect會有人突然上嚟，畢竟呢個商場嘅運作模式係比較特別。
「係，有現貨，係咪要？」佢亦都好直接。
點算好呢，好難諗，講咗就要買，呢啲賣家唔會同我嘥時間磨，亦唔會俾我玩住件嘢嚟諗。
「美國返嚟嘅，一定全新正貨，重有盒添。」
我：「咁…我買啦，麻煩畀我望兩眼先。」
然後佢就喺個四桶櫃瘋狂咁摷，摷咗三分鐘先攞到個透明袋出嚟，再潛咗其中一盒出嚟交畀我；我打開望一望，係幾靚嘅，雖然自己完全唔好呢啲嘢。
我：「係咪二百五？」
「係，如果唔要盒可以平多五蚊畀你。」




我：「吓…你賣全新水貨hold起個盒會有用㗎咩？」
「呢啲嘢你唔明㗎喇，總之唔會呃你啦，你畀完錢我借埋個放大鏡畀你慢慢驗都得。」講真吖，佢哋呢啲生意模式我真係唔多明，亦知道我就算有顯微鏡都唔會識驗。
我：「咁又唔使，我信你，嗱，呢度二百五，要埋個盒啦。」然後一手交錢一手收貨，無其他了，單都無。
「多謝幫襯，如果有其他朋友仔需要叫佢嚟睇我個page啦。」然後佢又繼續喺度玩電話。
係有少少貴嘅，但QQ一定用得著先，如果唔啱亦好易放返出去，唔會好似鮑魚咁食完覺得唔好食就揼心口，希望QQ會開心啦，咁我都算解決咗一個難題。
買完禮物我又諗住去睇下獨角仙，點知轉咗個圈都搵唔返間鋪，係執咗？定搬咗？定其實間鋪係位於呢個商場嘅一個異空間而我搵唔到條時空裂縫？你知啦，呢個商場咁神奇乜都有可能發生嘅。
甲蟲就搵唔到，俾我搵到間鋪門口有兩件馬甲…