【代糖故系列】《她被寄宿到屋邨男孩的家中》: K82

放工返屋企，QQ喺度，如果佢重未返我就堅係擔心。
我：「咦，妳重未換衫沖涼嘅？」佢重係化住妝著到靚靚咁坐喺梳化上面，個樣好似幾愉快，但就唔係話興奮狂喜嗰種，似係諗緊嘢豁然開朗會心微笑嗰隻。
Q：「等你放工吖嘛，我都係啱啱返嚟無幾耐咋。」佢用溫柔嘅聲線同我講嘢，和藹嘅眼神望住我，帶住親切嘅笑容，向我內心傳嚟陣陣暖意。
可能只係我喺度FF，分分鐘佢重係沉醉緊喺佢同條仔嘅愛意上…身體入面多咗啲唔係屬於自己細胞嘅感覺。
我：「今日玩得開唔開心呀？」
Q：「OK呀，幾開心。」佢無再補充。
我：「咁就好。」俾著平時我可能會串佢玩咗幾多Q，有無高潮，中出定外射…不過佢今日生日，算啦。
我：「我幫妳買咗webcam喇。」
Q：「我見到呀，聽日一齊研究下點樣link去直播囉。」
我：「男朋友…送咗乜畀妳呀，合唔合格？」無論係乜原因我都想知，絕對唔係為咗比較。




Q：「都幾好，係一個銀包嚟。」佢伸手喺身邊攞起一個咖啡色盒打開，入面係一個奶茶色嘅拉鍊銀包，格仔紋上面重印咗啲粉色嘅花花手繪，的確係幾靚；小弟不才唔知呢嚿嘢乜名堂，但睇樣已經知肯定要四位數。
我都想做靚女…可以周圍呃禮物。
我：「睇嚟妳好滿意喎，不過妳本身個銀包都未爛。」
Q：「我好惜啲嘢㗎，點會咁易爛喎，不過唔緊要吖，有新咪用新囉，舊嗰個你幫我放咗佢啦，有七嚿水以上就得，你記住話係女仔用喎，不過我唔出去交收，如果人哋問你就話幫家姐賣啦。」睇嚟佢都知細路女唔應該用名牌嘢，話係家姐放成件事就好睇好多。
喺而家呢個世代，有禮物收就等同有收入，只要人見人愛，車見車載，貨如輪轉。
我：「其實，我都有小小心意畀妳…」於是我遞出隻攞住個上面印住PANDORA嘅小盒嘅手，再交到QQ手上。
Q：「你傻嘅咩！做乜嘥埋啲無謂錢！？」
男朋友送銀包畀妳就係天經地義，我送少少飾物畀妳就係嘥無謂錢，咁究竟係好事定壞事？
我：「唔無謂㗎！我有認真諗過妳用得著先送畀妳，我記得妳講過男朋友送畀妳嗰set得三粒太過稀疏鬆散，所以…咪略盡綿力幫妳加多一粒咁大把咋，妳都知道我能力有限…送嘅嘢又無新意，但我就係唔想嘥錢，希望妳會鍾意同開心啦，祝妳生日快樂！」
Q：「你漏咗一樣嘢，已經啱啱過咗十二點喇。」