【代糖故系列】《她被寄宿到屋邨男孩的家中》: K93

QQ好似都係擔心個金主會嚟搵佢咁，簽收完就命令我攞貨急急腳走人；正如QQ所講咁，呢件嘢重過一包大米少少，但就去到我心口嘅高度，搬起上嚟都幾捩hea，打直攞成隻屐咁，打橫攞又好長驚撞到其他人。
我：「陶小姐，咁而家係咪去食嘢先？」
Q：「唔準玩我個名呀，食乜鬼，呢度邊有嘢好食。」
我：「吓，呢度都算係大商場嚟喎，餐廳都十幾廿間…」
Q：「我意思係今日出嚟做正事，無必要嘥錢喺度食啦…」咁又係，如果YY請我就唔同講法，QQ真係好。
我：「K生個女，我想問…乜呢件嘢入到地鐵嘅咩？」
Q：「你係咪唔生銹重要繼續玩我個名呀？」
我：「好重吖嘛，妳惜我一啖先咪唔玩囉。」
點知佢一下就啜卟咗落我嘴上面，女神的吻…真廉價。
Q：「其實…剩計高度就已經過咗limit，不過呢，啲職員對樂器會寛鬆啲可能隻眼開隻眼閉，或者去填張申請表囉。」




我：「你咁大個紙皮箱，人哋會唔會當樂器處理呀…」
Q：「這個嘛，一係去試下搭巴士？而家非繁忙時間，司機應該當睇唔到嘅，如果上唔到…可能要搭的士，應該六七十蚊啫。」講真我對的士車尾箱size無乜概念…
但如果我無記錯，林過雲將成個人放咗入車尾箱。
我：「話時話，通利買件咁大嘅嘢唔包送貨嘅咩？」
Q：「都話我唔會俾人知我住邊咯！同埋唔送平啲掛。」
結果，我面懵懵成隻屐咁抱住個箱上巴士，個司機真係時運高呀！竟然乜都睇唔到，好彩個箱唔太厚貼住我成個人都無乜違和感，又或者佢顧住昅我後面個女神所以選擇戴有色眼鏡嚟睇嘢。
明明短短嘅一段路，返到我條邨，十足十打仗咁。
Q：「喂，不如你去買兩盒燒臘飯返去食咯。」
我：「玩咩，我攞住件丈八蛇矛咁款嘅嘢，入去街市撩架打咩，同埋我都無手搦，梗係妳去買啦。」
Q：「點得呀，如果俾人見到我入街市買燒臘飯我以後重使出嚟行嘅？嗱，我喺商場門口睇住個箱先，你入去買啦。」搞笑，喺一田買雙餸飯嘅時候又唔見妳好似而家咁小心，定係一田係中產地方妳就鬆懈咗喇？




我：「咁麻煩㗎，就算而家有同學經過妳都一身蟻啦。」
Q：「點同，我而家只係喺度使喚緊我隻奴隸。」
我：「係呀？使喚呀，使唔使操弄埋添呀？」
Q：「唔想去就返屋企放低嘢再自己落返嚟，自己揀。」
我：「咁妳喺度等我啦…」然後就仆咗入街市買飯。
五分鐘後…我：「嗱，今次要妳幫我攞返喇。」
Q：「咦，咁重嘅…你重買埋橙添！」
我：「無晒生果吖嘛，橫掂妳而家要幫手搦，嘿。」