【代糖故系列】《她被寄宿到屋邨男孩的家中》: K127

Q：「喂，女僕長妳好呀，我係Kuromi妳記唔記得我呀…唔係呀，我有其他方法搵外快喇，今次係想問下如果包妳個場搞活動唔知得唔得呢…嗯，我諗平日夜晚就得，大概七點半打後咁囉…係呀，呢個要麻煩晒妳，都係跟返平時餐單上面啲嘢整就得，我諗好會confirm妳…應該最少都有十個，最多可能十五六咁，我會計返好晒原本幾錢再收佢哋貴啲，同埋唔知道可唔可以叫佢哋直接入數或者PayMe畀妳先？一來妳可以收晒錢先唔使驚佢哋放飛機，二來我自己啲戶口唔係幾方便…嗯，麻煩晒妳呀，同埋想問下紗織佢係咪重喺度做緊呀，如果係嘅話我想邀請埋佢嗰日一齊幫手…明白，如果我有確切日子同人數會早三日同妳講㗎喇，等我好消息啦，唔該晒，bye bye。」
幾個月前重成個傻妹咁去見工，而家就已經同人謦生意咁嘅口吻…其實傻妹係我屈佢，佢從來都唔係。
我：「一次過咁多客，啲嘢食應該平啲啦。」
Q：「又唔係咁計嘅，佢平時限時㗎，同埋影相都賺唔少，我唔係諗住靠個gathering嚟賺錢啦，只係等佢哋中毒更加深，平時就會課金畀我㗎啦。」
我：「直播女真係好恐怖，係惡魔嚟。」
Q：「呵，使乜講，鬼叫我惡魔得起呀。」
計我話，現代除三害就係直播妹，抽卡game，重有馬會…夠晒黃賭毒。
我：「咁…妳諗住每位收幾多呀？」
Q：「欸…平時一個主食加嘢飲就大約百三四，影埋相都差唔多二百，我諗住嗰日可以再加多少少小食嘅，同埋每人可以點一首音樂，即係大約三百蚊到啦。」
我：「多謝妳為間苦苦經營嘅女僕餐廳帶嚟四千幾生意，就…位位收三百一十四啦。」




Q：「嗯，點解係咁撩棱嘅數目？」
我：「一位三一四即係一生一世，重係白色情人節同埋丌。」喺酒樓做得多，見慣二人餐五二零，家庭餐一三一四，開年飯二二八八，豪華版三三八八…
Q：「咁就三一四啦，反正對佢哋嚟講應該唔算係乜嘢錢嚟。」可想而知女神平時有幾鋸到佢哋一頸血。
我：「嗯，加油努力，呢件事我應該幫唔到妳啲乜…」
Q：「乜呀，我預咗你嗰日都要去㗎。」
我：「吓，我點解要去，三一四夠我煮好多餐喇。」
Q：「咪講咗嗰日唔係為賺錢，你要去暗中保護我㗎。」
妳咁講…又好似幾有道理，但眾目睽睽之下又可以有邊個打妳主意喎，除非佢哋成班夾埋…咁嘅話睇怕連嗰個乜嘢紗織都會無剩，我得一個人做唔到乜…除咗join埋一份。