【代糖故系列】《她被寄宿到屋邨男孩的家中》: K128

明明妳班fans又房管，又騎士，又勇者，做乜唔叫佢哋保護妳？唔通宮中造反係必然嘅，所以先要切咁多太監出嚟？唔怪之得佢成日都話要閹我…
我：「去囉…當見識下世面，人哋去覲見女神，我就去俯視毒撚眾生，抵到爛啦。」
Q：「喂，你去到唔好亂講嘢得罪人呀，救命…真係課到金嗰堆，我諗毒極都有個譜嘅。」
我：「OK，OK，我識做㗎喇，但我有一個問題，佢哋成日嚟睇直播，有啲係會互相認識，起碼都認得個網名啦係咪，我連朵都無個如果人哋問起點算？」
Q：「又係喎，咁就…你就扮自閉毒撚，聲都唔好出，我諗其他人見到咁就唔會再同你講嘢。」
女神妳好嘢呀下，信唔信我…但其實我都無佢符，因為人哋真金白銀唔知課咗幾多先有得見佢，而我就日日可以同佢生活得咁親密，重點反抗喎。
Q：「唔好唔開心啦，其實你先係課得最多嗰個，好應該嚟支持下我嘅。」
妳再講落去吖，我會更加傷心㗎，我畀妳嗰啲唔係叫課金，係全心全意照顧妳，就連妳叫我抽返水我都無咁做…
Q：「你覺得我嗰日著乜好？」
我：「唔識答，妳賣肉吸引返嚟嘅fans唔會想妳著衫…」




Q：「…，簡單啲，不如諗下著乜嘢顏色？」
我：「Kuromi主題色，黑加粉紫？」
Q：「但我喺呢度又唔係叫Kuromi。」
我：「咁…黑桃王后，女僕餐廳…Gothic Lolita黑紅？」
Q：「雖然有啲娘，不過動議獲得通過。」
QQ有啲fans都重係學生，佢而家又比較得閒，所以既然諗住搞就想盡快了咗件事佢；我哋即時又上某宝睇下有乜選擇，唔好以為定咗色調同主題就好易揀，未做過女仔好難感受到嗰種茫無頭緒嘅花多繚亂，有蘇格蘭紅黑格，有瓢蟲式波點，有宮庭式花邊疊布，有復古中世紀紋路刺繡，有教廷式布塊平疊，有印象派色塊拼接，有動漫式飽和高光…唔好話我，QQ都轆到手軟。
Q：「唔得，呢啲太grand，太正經，呢件太fashion，唔啱個主題，我諗要收窄個範圍，就…好似彌海砂嗰種。」
彌海砂，眾所周知係一個黐線瘋狂，經常跳線嘅暴露少女，一般嚟講以黑色或紅黑做主題；我上網睇一睇，原來佢都有過格仔裙嘅setting，其他keywords包括吊帶，低胸，馬甲，通花，襪帶，長boot，走光…嗯，簡而言之都係少布啲性感啲，傳統Gothic裙太heavy喇。
Q：「不如…呢條？」
我：「高難度喎，不對稱設計，不過妳handle到嘅，有身材就著乜都咁靚。」