【代糖故系列】《她被寄宿到屋邨男孩的家中》: K129

Q：「唔諗喇，就試下啦，反正應該無人想留意我件衫。」真係吹脹，佢都知只係自己貪靚。
然之後佢就出post，直播賣廣告，又引嚟一堆友課金，因為有啲人想達到門檻可以出席見面會。其實…明眼人一睇都知係個死港女喺度圈錢，點解重咁多人樂此不疲，唔通真係太多錢用唔晒要分啲畀妳？
當然QQ亦唔會收咗錢唔做嘢，知道咗大概有邊個會嚟之後佢已經即刻問埋佢哋要點乜嘢歌，呢一日佢由朝早起身練到晏晝，睇怕係想每一個參加者都可以收到個滿意嘅演出，有時我會問佢既然直播嗰陣人哋即點妳都可以彈到咁點解重要練，佢就話可以揀返個貼近原版嘅arrangement，fill返啲裝飾音咁…講完我都識條鐵啦。
Q：「喂，你都點隻歌啦，如果唔係唔啱數。」
我：「我…有乜好點喎，平時我都唔會要妳彈畀我聽，妳自己諗一首塞落去我個quota度咪得。」
Q：「而家迫你揀呀，但唔好同我講let it go呀下。」
我：「點解呀，因為已經俾其他人點咗？」
Q：「唔係，我平時成日都彈，重邊有人會點呢首。」
我：「咁我點…Eva嗰首配樂啦。」
其實我有啲想講真的愛妳就算，但老套到過唔到自己嗰關，正如我唔唱K都知而家點紅日係會俾friend笑死。




但海闊天空無問題，獅子山下無問題，我唔係幾明…
Q：「玩嘢呀，福音戰士嘅歌出名都十首八首…」
我：「所以咪話係配樂嚟，有啲悲情，係個女仔唱。」
Q：「我發覺…你真係撩架打㗎喎。」
為咗唔好激嬲佢，我唯有回想返起我睇動畫時聽過嘅音樂，同埋公主優美嘅嗓音，再用我五音不全嘅聲線哼咗幾粒音出嚟，哎唷，真係好尷尬嘅啫。
Q：「嗯，我大概知你講邊首喇。」
我：「真係㗎，我哼到走晒音妳都聽得出？」
Q：「當我流㗎？聽個音距就會feel到㗎啦。」
然後，就有個矯正版嘅音樂喺佢部電話播出嚟。
就梗係唔係播Youtube啦，佢keyboard即彈㗎。




我：「嘩，好叻女呀，愛死妳。」請原諒我只能偷偷咁表達愛意，好似妳咁出色嘅女孩我點高攀得起。
Q：「嗯，同埋呢首原本唔係福音戰士嘅配樂，係日本一隊民謠樂隊叫赤色鳥寫嘅，歌詞係祝願天下間所有小朋友都可以受到保護，喺個美好嘅環境中茁壯咁成長。」
我：「原來係咁，唔錯唔錯。」
Q：「唔啱你聽囉，呢啲滿腦子歪念已經壞咗嘅細路。」