【代糖故系列】《她被寄宿到屋邨男孩的家中》: K144

我：「細個睇過耶穌傳，其他乜都唔識，剩係知彼拉多放生咗巴拉巴，然後釘死咗耶穌…不過呢隻彼拉多…都幾乖喎，一聽到雞聲就識摺埋。」
Q：「梗係啦，人哋有返學㗎。」
我：「吓，狗都要返學？！不過，佢好似唔係人哋，而係…狗哋喎，好似有啲怪。」
Z：「其實…上咗兩次一個禮拜嘅training啫，大狗一定要訓練㗎，如果唔係會好危險同麻煩。」
Q：「聽到未呀，你個強盜醒定啲呀，如果第時你敢蝦Zilvia嘅話，彼拉多實撕開你兩半。」
Z：「應該唔會嘅，佢其實有啲細膽。」
我：「係乖得滯啫，不過佢真係好重，頭先我想抱住佢起身完全推唔郁…」
Z：「係呀，佢好重，百一磅有多…」
我：「吓？！咁…咁咪重重過…」我嚇到眼都凸埋。
Z：「係呀…重重過我。」佢有啲面紅。




我：「咁重唔重得過妳？」
Q：「你咁望住我乜意思呀？係咪活得唔耐煩！」
Z：「呀！我知道妳點解叫埋佢嚟喇，妳一定係唔想執彼拉多啲poo poo。」佢望住QQ對眼笑得好甜。
Q：「有人犯賤想做下苦工，我又唔介意嘅。」
Z：「咁…辛苦晒你哋…乞嗤！Sorry…」
Q：「妳返上去抖下啦，隻狗交畀我哋就得。」
然後Zilvia將條狗繩交咗畀QQ，一個硬布袋交咗畀我。
開始帶狗，但我手上面個布袋重到…我望一望。
我：「嘩，使唔使帶兩枝水呀？加埋成兩Lit，呢隻嘢有無飲咁多水？正常人一日都係飲兩Lit…」
Q：「大嗰枝係沖殊殊用㗎，低B，細嗰枝先係飲。」




我：「原來係咁，妳哋真係好手尾。」
Q：「無辦法呀，佢太大隻，一屙就屙好多，唔好廢話喇，我要開始跑，如果佢殊你就自己執生啦。」
原來養狗咁辛苦…雖然我從來就無諗過要養狗；其實又係嘅，正常外國嘅狗，可能每日喺個大牧場，至少都喺個大花園跑來跑去，就好似我以前咁，如果成日屈喺屋企，落街都只係慢行嘅話好似唔係幾好。
望住QQ喺我前面跑落山，我就攞住枝水喺度救火，好難想象到睇落斯斯文文弱質纖纖嘅Zilvia平時係點樣自己一個帶狗，呢堆女仔真係好犀利；就算睇住QQ帶隻同佢一樣重嘅狗跑步都覺得佢威風咗好多，正常人絕對唔會敢蝦佢，雖然QQ本身就係個女強人嚟。
落到京士柏公園我哋又圍住個大圈跑，呢度好多斜坡又有樓梯，但就梗係難唔到隻狗啦，我諗佢跳火圈都重得。