【代糖故系列】《她被寄宿到屋邨男孩的家中》: K145

跑完一大輪，隻狗就好似有程式咁識得自己減速，搵咗個樹蔭位自轉兩圈，再爆發啲我唔想見到嘅嘢出嚟。
我：「我…應該點處理…」我再黐線都唔會想執屎。
Q：「入面應該有個好似大震蛋咁嘅嘢，可以抽啲狗屎袋出嚟，如果你唔想掂到啲屎可以用卡紙鏟起掉落去。」
我：「呢個？係咪妳會將佢當係震蛋咁玩？」
Q：「知唔知我吹兩下雞彼拉多就可以咬走你雞雞？」
呢條女同隻狗跑咗陣就當正自己係佢個主人咁，好彩彼拉多唔係俾佢養，否則佢變咗做軍犬都似，到時多多十字架都唔夠用，唔知要砍伐幾多森林先夠。
我：「嘩，啲卡紙…又名錶又手袋，紙質重好鬼死靚。」
Q：「有乜特別，商品catalogue嚟，買嘢就有時會跟埋㗎啦。」
我：「真係大嘥，啲紙同印刷重靚過圖書館啲動物圖鑑，好鬼貴㗎，本本都三四百蚊。」
Q：「無辦法㗎喎，呢啲嘢…我哋擺下擺下就成屋都係，最後咪又係攞去回收，而家剪出嚟鏟狗屎算有貢獻咗㗎喇，呢個世界係咁…不過你講得啱，其實啲catalogue係有價有市，一本隨時放到成嚿水，有時啲絕咗版或者唔知點解特別有珍藏價值，喺eBay炒到過千都有。」




我：「其實非洲每日都有好多小朋友…」
Q：「每經過六十秒就唔見咗一分鐘…你講呢啲無用㗎喎，豪宅區…隨時每日掉出嚟嘅玩具都貴過晒你咁多年以嚟所買嘅，就算養呢隻狗都貴過養你啦。」
我：「呢個我都明。」世界就係咁，難為正邪定分界。
Q：「而家興網上買賣交收算好咗，好多嘢可以落到去有需要嘅人手上，無咁浪費。」
一路鏟狗屎，一路諗養佢要幾錢，真係百感交集。
我：「Queenie，妳而家過得開唔開心呀？」
Q：「開心呀，我珍惜我擁有嘅，同埋我做到嘅。」
我曾經諗過QQ到底係咪一個例外，係咪所有女仔都可以咁堅強？係因為佢叻？係因為本身已經有足夠內在資源？係因為個background同環境可以令佢哋點都撐得住？但點解咁多人日日喺度嗌生嗌死？係咪好似細蚊呢啲咁嘅傻妹就注定要受苦？不過有人考唔到第一就話讀書大壓力，有錢人一樣可以精神病…
我：「其實隻狗叫彼拉多係咪真係關嗰個彼拉多事？」
Q：「你真係想知？個故仔有啲長，而且重有啲無聊。」




我：「講啦，難得我咁啱識彼拉多呢個人。」