【代糖故系列】《她被寄宿到屋邨男孩的家中》: K146

Q：「好啦，如果我無記錯呢隻狗係喺Zilvia升五年班嗰陣買嘅，佢係讀天主教小學，當年佢聖經堂要個個禮拜聽耶穌，而耶穌被釘就係喺佢四年班嘅課程入面，教佢聖經個Miss就描述到比拉多唔係一個好壞嘅人，佢受制於羅馬君主同猶太長老會嘅壓力，迫不得已用自己嘅執行權嚟處死耶穌，判決之後佢表面自己唔係宗教呢方面嘅專業人士，亦唔清楚耶穌到底犯咗乜嘢罪而要處死，跟住就金盤洗手，去到晚年佢一直逃避唔到自己嘅愧咎感，最後畏罪自殺被葬喺瑞士嘅一座山上面，而座山就叫彼拉多山，因為呢隻狗係瑞士山地犬，當時嘅Zilvia就諗起咗呢個故事，同埋佢希望彼拉多唔好學故事入面嘅彼拉多，要克盡己任，明辯是非，唔好濫用權力而做成悲劇，就算身為大狗都要克制唔好亂咬人，所以就幫佢改咗彼拉多呢個名。」
我：「一個四年班嘅女仔會諗咁多嘢㗎？」
Q：「哎吔，咁多年可以加加減減㗎嘛…唔好問住先啦，佢跑完要食茶點㗎，你攞出嚟先啦。」
個硬布袋入面有一兜一碟，我攞咗個兜出嚟裝水，彼拉多好快就飲到舐舐脷咕嚕咕嚕，重有隻碟同埋…
我：「嘩，係雞全髀連扒呀…」而且係輕微焗熟。
Q：「喂，你唔係諗住打隻狗斧頭呀…無乜調味㗎。」
我：「我未有咁黐線嘅，咁…彼拉多真係唔係壞人？」
Q：「我查返資料，雖然彼拉多喺耶穌受死呢段歷史入面佔據非常重要嘅位置，但有關佢嘅歷史記載其實唔多而且非常之亂，某啲史學家話佢係專橫無道，不理政務，甚至經常濫殺無辜嚟解決問題，而佢最後點死同喺邊度死都無一個明確答案，葬喺瑞士彼拉多山都只係一個傳說嚟。」
我：「即係聖經堂講嘅係大話，佢係一個衰人？」
Q：「亦無可能肯定到，有機會係佢仇家寫衰佢。」




我：「咁聖經堂做乜要咁教？」
Q：「小學嘛，永遠都係想小朋友學識反省，悔改，同埋原諒其他人，咁樣教個故仔咪好聽啲，小朋友亦都會易啲接受個心舒服啲，不過史學家嘅共識就係彼拉多金盤洗手確有其事，所以應該唔係存心想耶穌死，可能只係覺得事不關己咁囉。」
我：「哦可…妳咁熟聖經歷史㗎咩？」
Q：「唔係喎，係因為隻狗我先走去查。」
我：「點解妳可以咁好學嘅，只係個狗名…」
Q：「因為好奇心囉，同埋唔想自己理解錯一啲嘢。」
身邊呢個女仔，同自己嘅距離永遠就係咁遙遠；而彼拉多已經好開心咁將佢嘅茶點刨到只係得返兩條骨，一路繼續流口水一路望住我傻笑。