【代糖故系列】《她被寄宿到屋邨男孩的家中》: K155

我記得QQ講過，因為買幣渠道五花八門，課金額雖然唔等於虛擬金額，但佢最少係攞到大概三成；如果二千排廿幾，即係頭三十名平均課金額可能三千左右，三十乘三千乘零點三即係…二萬七！佢播咗五個月左右即係平均月薪有成五千幾！屌，係我double咁滯，唔怪之得唔覺佢呢排點問我攞錢，而且生活質素好似唔錯。
沙：「好，主角要出場喇，等我較暗少少啲燈先。」
望住QQ行出嚟，呢種感覺…明明我喺屋企幫佢著過件衫，但而家睇住佢我竟然覺得有啲明星feel，或者係日本idol，大class cosplay女仔咁。
佢嚟到出面教師枱前面停低，雙手撐住枱面十足十一個變態女Miss咁，向大家點一點頭，全場男仔無一唔係屏息靜氣粒聲唔出，見證呢個無樣直播女嘅真面目，雖然帶住副奇形怪狀嘅黑超…但唔緊要啦！剩係對腳，個心口，加埋個膊頭同玉背，已經夠晒煞食。
佢擰轉身，攞起枝黑色箱頭筆喺塊白板上面畫咗一個好女仔風格嘅葵扇出嚟，再加個Q字，下面寫『各位好！』。
「黑桃王后…妳好…」前面幾個男仔疏落咁回應佢。
Q：「喂，其實你哋係咪諗住我今日都唔出聲㗎？」
「噢！女王終於出聲喇，實在太好！」
「女王你睇下，我連伊莉莎白塊寫字牌都攞埋嚟！」
「妳把聲實在係太好聽喇！完全襯返晒妳人設！」




有咁嚴重咩…論聲嘅話Zilvia可以話係贏晒喎。
「加埋把聲，加埋個樣，堪稱perfect啊！」
「但係女王點解要帶黑超嘅？明明係見面會…」
Q：「關於呢樣嘢…由於哀家間學校，由於哀家嘅屋企人，如果我直播呢件事爆咗出去嘅話，大家就肯定以後都唔會再見到我㗎喇…所以懇請大家忍讓一下，呢個已經係哀家最大嘅尺度嚟，同埋，今日呢個活動係謝絕攝影同錄影，請大家諒解，不過大家臨走都可以帶走一張同我影嘅cheki嘅，但就麻煩唔好放上網喇。」
「係呢係呢，女王係讀邊間學校㗎？」
Q：「呢個，就當然係秘密嚟㗎啦！」
「女王大人，呢度係我哋三個為妳獻上嘅少少心意。」
坐頭排正中嗰兩個，喺枱底攞咗個盒出嚟，盒入面有一紮玫瑰花，連埋單丁位嗰位人兄一齊行出去獻媚。
頂唔順，喺網絡世界都還好，搬返嚟現實真係勁老尷，使唔使嚟個比武招親咁先安樂？
Q：「哎吔，使乜咁破費呀…林沖大哥，衛兵Jefferson，重有…冰無痕，多謝晒你哋。」QQ接過一紮玫瑰…




妳個港女QQ，明明鋸到人哋一頸血，重喺度扮乜嘢大方吖；而呢啲網名滿天飛嘅網聚，真係好Q奇怪呀，雖然我好似無乜資格話佢哋，因為通街嗌我交叉仔其實都正常唔得去邊…
「女王大人，紅玫瑰象徵咗妳嘅高貴豔麗明亮動人。」