【代糖故系列】《她被寄宿到屋邨男孩的家中》: K156

「五十二朵玫瑰花，代表咗我哋對妳嘅愛慕。」
「五十二亦都係一副啤牌嘅數目，代表咗葵扇女麾下我哋呢個大家庭，雖然今日我哋只係得十幾個人，但以後一定會更加茁壯成長，變成一支大軍！」
嘩，使唔使呀，已經差唔多去到求婚咁嘅造作級數…真係畀少少錢嚟食花生都抵，好心阿健呢啲就嚟學下嘢啦；不過前排三位突如其來嘅出風頭爭寵獻媚活動，就好似惹嚟後排嘅人兄有少少不滿。
A：「可惜，鮮花總會有凋謝嘅一日，女王大人，我啱啱喺平台送咗紮藍玫瑰畀妳，請隨時驗收。」唔通活動重未開始，佢哋已經要展開鬥課金活動？唔係咁猖狂呀…
咦，呢個咪就係QQ所講嘅Anson？嗯。
Q：「冷靜…冷靜啲，好多謝大家嘅好意，今日呢個活動最想做嘅係同你哋互相認識，同埋等你哋可以親身欣賞到我嘅演奏，所以…真係唔使太激動…非常感謝…」
「其實我都準備咗盒朱古力，女王演出加油。」
「呢度有個鋼琴嘅胸針飾物，一次過啦，請笑納。」
見到佢哋爭寵個樣，我就醒起…有條電線重未交畀佢，本來諗住無機會直接畀佢要託個女僕妹妹幫手，而家就啱啱好等我可以名正言順行出去將個鹹碟袋交到佢手上。
你問我乜係鹹碟袋？咪…無商號嘅黑色平口膠袋，細過A4 size少少，上面有啲銀色嘅斜間或者星星，信和同黃金最鍾意用呢隻袋…睇怕呢個年代個個上網睇AV無人買翻版鹹碟所以無人識；至於我就當然唔係買鹹碟學返嚟，係去信和買二手爆旋陀螺零件間鋪個老細教我。




我：「希望黑桃王后妳用得著。」
Q：「嗯，多謝你。」如果他日佢紅咗，我真係收得皮。
我貴為角落頭通宵更城牆衛兵，呢個舉動換嚟無數嘅眼神死光射落我身上，不過我唔驚！喺學校我都食到慣…
Q：「非常感謝大家嘅厚愛，今日嘅活動要正式開始喇，雖然大家一定認識我，但都請容許我再一次介紹自己，我就係今日為你哋鋼琴演奏嘅黑桃王后，請大家多多支持小妹，另外呢位就係今日會為我哋服務嘅女僕侍應生沙織，一陣間呢位超級可愛又靚女嘅女僕就會為我哋奉上食物，實在非常感謝佢今日嘅幫忙，大家畀啲掌聲沙織！」
「沙織妹妹好靚女呀！」「我第一次嚟女僕餐廳㗎咋！」
而沙織姐姐亦都好純熟咁向大家行咗個女僕禮。