【代糖故系列】《她被寄宿到屋邨男孩的家中》: K158

Q：「咁多位，雖然以哀家嘅手勢實在唔敢嘗試整嘢畀大家食，但幫你哋沖下茶都係可以㗎，有四種選擇，分別係English breakfast，earl grey，darjeeling同埋camomile，陣間我會埋嚟問你哋想飲乜。」
講真佢煮嘢食就實在不敢恭維，但沖茶佢的確係有一手嘅，見佢攞咗四個玻璃茶壺出嚟，有條不紊咁喺個茶隔入面放入唔同嘅茶葉，再加入滾水，喺等嗰陣佢就首先問前排嘅哥哥飲啲乜，過咗兩分鐘之後佢就逐一順序攞返個茶隔出嚟倒走啲茶葉；無錯，女神飲茶係唔會飲第二浸嘅…講笑，聚餐收得呢個價，嗰少少茶葉都唔算得係啲乜嘢錢，當然可以只用最精華嘅部份嚟奉客。
沙織當然忙到甩轆，因為要攞十五套杯碟出嚟。
等咗幾分鐘佢終於行到埋嚟第三排問我哋飲乜。
Q：「諗唔到改乜名嘅守護天使，請問想飲乜呢？」
「欸…earl grey吖，麻煩晒王后大人。」
Q：「好，最後就輪到你嘞…」
我：「Darjeeling吖，唔該，我尊敬嘅王后陛下。」
講真我平時邊有機會飲西茶，雀舌香片我就識啫，揀darjeeling純粹係因為QQ講過鍾意飲呢隻。
Q：「啱啱俾人點晒啦，你等多陣啦。」行開咗。




「女王…佢好似唔太鍾意你咁喎。」啲上流課長鬥到你死我活嘅時候，我哋呢啲山區兒童一樣可以五十步笑百步。
我：「欸…其實我本身無得嚟嘅，係因為突然有人嚟唔到，佢先喺後備名單度搵人，咁啱我又真係得閒…」
「咁唔怪之得嘞，我見你課咁少。」
得喇，知你哋叻叻，你哋嘅每一蚊其實都係喺度減少緊我嘅負擔，我又點會賊喊捉賊呢？
沙：「唔好意思咁多位，由於今晚實在太多人所以準備唔到啲特色飲品畀大家，但呢度有檸檬同淡奶可以隨便取用嘅，如果想飲汽水呢度都可以free flow…」
「有女王沖嘅茶就已經乜都夠晒！」
「係呀，就算唔加糖加奶都又甜又滑。」
喺呢個時候，我都唔知應該羨慕自己定妒忌佢哋好，明明我可以日日同QQ一齊生活係好幸福，但就比唔上佢哋呢種無厘頭迷戀純粹嘅開心，至少佢哋唔會經歷到親眼目送心愛嘅人出門同條仔交配嘅心酸…算喇，都係唔好諗咁多，難得啲嘢食幾好味就專心食下嘢先。
等咗一陣，沙織開始推啲主菜出嚟，亦都係由第一排上菜先，好多傻仔點咗蛋包炒飯。
「想問，係咪叫女王喺上面畫都可以㗎？」




Q：「但係我唔係專業女僕嚟喎，好可能唔會靚。」
「唔緊要呀，係妳親手畫就可以。」對住重課人士QQ當然唔敢say no，所以就攞起枝茄汁準備，而沙織亦都好醒目，即刻上埋畀第二排再問佢哋要畫乜。