【代糖故系列】《她被寄宿到屋邨男孩的家中》: K157

Q：「事不宜遲，等我而家抽第一首演出曲目出嚟…就係Ado嘅Usseewa，呢首係一首非常高難度嘅曲目，亦都係一首非常有意思嘅歌，點呢首歌嘅冰無痕一定係想帶出我哋做人要有自己思想，唔應該墨守成規，要勇於無視世俗眼光打破框框搵出自己生命嘅意義…」
有時喺屋企慣咗同QQ有一句無一句咁謦欬，真係唔多慣呢個超oral狀態嘅佢，介紹首歌都可以講咁多嘢…
然之後佢就放咗部notebook喺個keyboard上面，拉咗條喇叭聲駁落去後面個speaker，而沙織亦都搵咗個類似書架咁嘅嘢晾住咗佢紮花。
而又當然，呢首咁激昂又嘈嘅音樂我已經喺屋企聽過好多次，現場演出佢亦都無失準，睇得出咁多位觀眾都好感動…但正因為咁先更加突顯出我嘅渺小。
QQ要冧仔，我諗任何一個都可以手到拿來。
而啲參加者其實比我想象中正常，可能最毒腐宅樣衰嗰啲已經自我放棄，唔敢嚟呢啲真社交場合。
Q：「不如我哋而家直播返兩首歌，等啲嚟唔到嘅朋友仔感受下今日嘅氣氛好唔好？」
「好呀女王！就等佢哋羨慕下！」
Q：「嗱，我會影埋個現場環境㗎，如果你哋唔想俾人見到就自己遮住塊面啦。」
QQ將部電話交咗畀沙織，同佢講咗幾句之後女僕就幫佢做直播攝影師，最重要嘅嘢就梗係唔可以影到QQ個樣，話雖帶咗黑超未必肯定到係本人啫；沙織影下佢半身，又影下部keyboard同佢啲手指，重有我哋現場一班傻kai kai嘅男仔，前面幾個好唔知醜咁霸住鏡頭跟音樂節拍揮動雙手，而我隔籬嘅宅男就即刻開直播平台睇下睇到乜…




喺大概十首歌嘅演出後，女王完成埋首豬可愛就宣佈進入聚餐環節，時間嚟到八點半左右，相信我哋打緊鼓嘅肚會令到呢度出品嘅食物變得更好食。
沙織亦都推咗架餐車出嚟，由前至後密鑼緊鼓咁為我哋奉上食物，木製托盤上面嘅就係偽西餐前菜三件套，分別係粟米忌廉湯，中華海草野菜沙律，炸薯角及炸假蟹鉗。
呢啲其實大家一早知，不過醉翁之意不在酒，食乜都無所謂啦；而主菜就係三揀一，分別有蛋包炒飯，日式咖喱吉豬飯，意式芝士肉醬意粉…講真，我抱住沒比較沒傷害嘅心態，三害取其輕揀咗個最難中伏嘅肉醬意粉，至於嗰啲可以畫畫嘅蛋包飯就算吧啦，食慣茶記熱辣辣炒飯嘅我對女僕炒飯係零期望，亦都好驚佢開包即食咖喱淋落啲白飯再加塊唔知放咗幾耐甚至乎係翻炸嘅吉豬。
咦，啲薯角都還好喎，係新鮮即炸唔差過M記。