【代糖故系列】《她被寄宿到屋邨男孩的家中》: K160

可以親身聽QQ彈琴，一齊食嘢吹水，重有戰利品攞走，大家面上都露出興奮嘅表情，而我就要喺度扮開心。
Q：「時間已經嚟到尾聲喇，就等我彈埋最後一首音樂畀大家聽好唔好？不如就歡樂今宵嘅晚安歌等大家返去瞓個好覺啦？」
「無問題呀！」「好呀，多謝女神！」
Q：「其實你哋知唔知晚安歌係乜嚟㗎？」
全場人你眼望我眼，得一個比較大嘅哥哥答佢：「其實大概都知嘅，以前啲老套電視歌嚟。」
QQ平時無乜嘢做就多數喺度開YouTube聽音樂，識埋一大堆普通小朋友根本唔會聽過嘅嘢，佢重好鍾意攞啲音樂嚟講笑，例如朝早彈香港早晨催我起身返學，彈聖誕歌同冰雪奇緣叫我開冷氣等等…即係let it snow咁樣。
Q：「算啦，都係潮返少少，彈sayonara噢，即係黎明嘅我的親愛，而且係男聲嚟，大家如果識唱可以上網開歌詞出嚟跟住唱㗎。」旋律隨即由喇叭響起。
總有一大堆舊歌，知道自己聽過又嗌唔出叫乜名，但一入到耳就會搵到嗰種所謂香港嘅感覺。
「Sayonara o Sayonara o，而為何心中總有情意在，你在我心頭像永遠沒變改，是我的我的寶貝親愛。」
都真係有幾多哥哥識唱，但就唔好對歌聲有啲乜期待。




知道活動要結束，大家眼裡都充滿依依不捨，彷彿呢世都唔會再有機會見到女神嘅真面目咁。
Q：「好喇，咁多位支持者，好多謝你哋今晚賞面蒞臨，哀家一定會繼續努力直播，不過而家要執埋啲手尾先，請恕我唔可以送你哋返屋企，sayonara噢，係咁先，之後網上再見！」講完佢就入返廚房。
沙：「希望各位主人今日有一個難忘嘅晚上，亦都歡迎主人隨時嚟支持我哋女僕餐廳，不過我哋而家係時候閂門喇，bye bye咁多位主人，本当にありがとうございます，行ってらしゃい！」
喺女僕沙織送行後，我哋一行十幾兩友出到（車立）口，一轉當然搭唔晒，所以又好有共識咁等前排啲人入先，佢哋就有講有笑互相分享張相上面女王寫同畫嘅嘢。
第二轉落到去，一如所料我見大部份人都係向旺角地鐵站行，所以我就：「我住油麻地行呢邊，bye bye咁多位…」
當然就唔會有人理我呢粒蘑菇，計計埋埋今晚我講咗三十句嘢都無，飾演咗一位專業宅男嘅角色。而當我去到登打士街之後就U turn行返轉頭，一直左右望觀察，去到樓下再兜多個大圈見無頭先嘅人就上去，上到去再睇埋後樓梯同廁所，應該…唔會有人無聊到去第二棟商場捕掛？
「叮噹！叮噹！」佢門口有電眼，我專登整個伸脷樣。
沙：「唔好意思，我哋已經閂咗門，請離開啦。」