【代糖故系列】《她被寄宿到屋邨男孩的家中》: K161

我：「欸…我係黑桃女王嘅朋友嚟，俾我入去啦。」
沙：「哈…好笑喎，個個都話係佢朋友㗎啦，點搞？」
我：「唔係講笑，我真係佢嘅朋友嚟，唔信妳問佢。」
沙：「真，朋友添呀？細路你課咗幾多呀？」
我：「妳同佢講我係粉絲編號三零六二四七零零，佢知道我係邊個，會俾我入嚟㗎喇。」
沙：「我先係呢度嘅正式員工，員工編號三零六二四七七零，呢度開唔開門係由我嚟話事。」
我：「沙織姐姐妳明明係女僕，做乜唔同咗樣嘅？」
沙：「我放咗工就唔係女僕嚟㗎啦，唔該你同我收皮摺埋彈開，唔好騷擾呢度嘅員工或者嘉賓。」
我：「妳咁同我講嘢，唔驚我以後唔嚟幫襯嘅咩？」
沙：「睇個樣都知唔會啦，角落頭嘅好朋友。」




我：「沙織姐姐，我鍾意而家嘅妳多過平時返工嗰個。」
沙：「唔使講廢話，我點都唔會放你入嚟，如果你堅持留喺度唔走，我可以搵大廈保安話你滋擾私人地方，甚至乎係報警。」其實我可以打畀QQ，不過幾好玩。
我：「沙織姐姐…妳個嘴角有肉醬喺度，嘻嘻，妳好可愛呢，我最鍾意作反女僕沙織姐姐，唔要啲乜王后嚕。」
沙：「黐…黐線㗎！唔好煩我呀！走呀！」講就咁講，但佢即刻面紅兼且用指甲刮走咗粒肉醬。
如果去返上年，我分分鐘夠膽用嘴銜走粒肉醬。
Q：「咦，係咪開方叉呀，可以放佢入嚟…」
沙：「真係得？佢入嚟…妳自己攪掂佢㗎喇喎。」
Q：「哎吔，佢唔係fans嚟㗎，呢個真朋友嚟。」
聽到QQ咁講，沙織塊面就更加紅咁即刻開門俾我入。
沙：「唔好意思，係我無問清楚…麻煩咗你咁耐。」佢好似即刻打回原形變返個女僕向我低頭解釋。




我：「傻啦，我要感謝妳盡全力保護Kuromi免受騷擾至係。」我都向佢微微鞠躬。
沙：「你…一早講話搵Kuromi咪好！」
Q：「你兩個唔好喺門口玩啦，入返嚟坐。」
入到去，十幾set枱凳已經搬返做原來咁嘅樣；即係我未嚟過，但好明顯四張學生枱會圍成井字形就知應該係一間餐廳應有嘅飯枱擺法嚟；而睇得出枱凳都啱啱抹完嚟，因為表面重濕濕哋，而最前一pair枱就放咗碟肉醬意粉，飲剩嘅茶，重有兜生菜。
Q：「沙織妳唔使理佢㗎，繼續食嘢就得。」
我：「嘩，重有咁多肉醬意粉剩嘅，員工福利唔錯噃。」
沙：「廚房重有，你係咪想要呀？」
我：「欸…會唔會唔係幾好，我無諗住幫襯㗎喎。」