【代糖故系列】《她被寄宿到屋邨男孩的家中》: K174

Q：「關我鬼事，又唔係我決定到押唔押韻嘅，你嘅結論係點呀，值唔值得出去玩下？」
我：「無嘅，望落都係正常group，出去玩咪純粹燒錢飲飲食食，我唔係特別好亦都唔抗拒，反正我就唔諗住識女，啲錢留嚟買餸好過，如果妳有需要我咪去保鑣妳。」
比起唔使錢同YY去船P，我當然揀後者，無論以數量計定質量計啲女都係大勝，而且我身份重係男友唔係保鑣…
Q：「我角度去下實無所謂㗎，呢啲嘢有無商業價值就點都要實地考察一次嘅，我只係喺度諗…會唔會啱阿健。」
我：「妳唔係諗住叫個傻仔同班狗公爭呀，我驚笑到噴飯喎，妳不如叫佢專心啲打機可能好過。」
Q：「又唔係爭，佢咁無膽識女仔爭條毛咩，只不過出去識下人，練習下同人交流未嘗唔係一件好事。」
我：「咁我覺得佢無問題喎，思想同講嘢都好正常，而且中文重高分過我添。」
Q：「咁點同，佢嚟嚟去去都係同你哋幾個，即係身邊啲friend溝通，咁梗係無問題㗎，但個天係唔會咁好心突然有個親密嘅女仔送喺你面前囉，邊似得你夠膽死去搵個大纜都扯唔埋嘅Bubble師姐。」
我：「點解係要燒到我…我搵佢只係一次性商業合作。」
Q：「你同佢進行，合作咗一次…『性』商業活動？」




我：「哎吔！係一次，商業性合作，妳點會唔明。」
Q：「明呀，你個腦九十九%都係同性有關㗎啦。」
我：「妳鍾意啦，反正就算我同佢扑埋都唔會衰十一。」
Q：「食咁多隻豬落肚肥死你呀，下世實做豬都似。」
我哋呢種既實際，又商業，但又不失親密同曳曳嘅鬥嘴已經進行過唔知幾多次，真係好佩服呢個女仔。
Q：「算，我交畀阿健做決定，如果佢扤頭我就入會。」
我：「唉，都唔知呢啲咁多陌生人嘅場合，我去係會幫佢定害佢，萬一啲女仔過嚟搵我玩唔Q理佢…」
Q：「發夢啦你，你估你真係男神呀？」
死妹釘，我真係好想將我點樣玩到妳個好朋友面紅耳赤，重有Wendy點一往情深，加埋Angel嘅啤酒妹挑逗全盤托出示威，但係唔得！鬼叫我鍾意嗰個係妳喎…
跟住QQ就message佢簡介一下乜事…




健：『OK，如果妳有需要，我一早做晒暑期作業，去玩嗰少少錢我自己畀返就得。』
Q：「唉，問佢係問咗等於無問。」
我：「梗係啦，妳個員工嚟㗎喎，女神叫到，就算做做下換腦手術都可以煞停個醫生剩係帶住半個腦仆出嚟搵妳啦，係咪先？」
Q：「咁如果係你呢？」佢意味深長咁望住我。