【代糖故系列】《她被寄宿到屋邨男孩的家中》: K175

我：「我個腦…橫掂九十九%都無用，留返一%嚟搵妳就夠，當然義不容辭啦。」
Q：「哈哈，好好笑，多謝你喎，咁我答應人哋㗎喇，希望唔好太貴，我會出埋你嗰份，之前話過請你去玩。」
我：「多謝…不過我哋啲錢有乜好計喎，都係一齊用。」
Q：「就係一齊用，先想你過得一樣咁開心，唔係下下就晒我，你呢排成日同阿健去玩，對運動鞋已經跑到蝕晒，得閒就去睇下邊度有特價，買對靚啲嘅畀自己啦。」
呢個QQ…教我點樣唔全副心意畀晒妳喎。
Q：「不過你嗰日玩還玩，唔好太唔檢點影衰我喎，就算溝女都唔好咁猴擒，斯文返少少知唔知，唔好開心得滯就得意忘形開晒黃腔咁。」
我：「唔會啦，無諗過要去識女仔，係妳保鑣嚟㗎嘛。」
Q：「咁又唔好長期黐實我，好怪㗎嘛，你又唔係我條仔嚟，有兩個男仔同我一齊去，相信唔會有人敢亂嚟。」
我：「明嘅，我大概都知點做嘅…」
Q：「不過嗰日晏晝約咗堆八婆tea，都真係幾忙下。」




我：「吓，開學都有得見啦，使唔使約前一日見呀？」
Q：「就係為咗謦下點開學囉，呢啲嘢你唔明㗎喇。」
女神們嘅生活真係既忙碌又複雜，唔係常人可以理解。
Q：「而且聽日同後晚要拍拖，諗起都覺得chur。」
我：「做乜搞到末路狂奔臨別秋波咁，來日方長吖…」
Q：「人哋升中六喇，你估下佢重有無咁多時間吖？」
我：「通常呢啲…好容易出現感情危機㗎喎。」
Q：「你想講乜呀？佢專心溫書就得，我又唔係嗰啲成日要仔陪嘅公主嚟，更加唔係水性楊花。」
有時我都會俾佢整糊塗，究竟我哋嘅關係係乜？我都好驚如果有一日我哋喺埋一齊，佢亦會同其他仔攬攬惜惜…
我：「連續兩日拍拖有乜做，玩勻兩個主題樂園呀？」




Q：「唔啦，去都去到厭，聽日係普通拍拖，後晚係去聽opera。」
我：「真係犀利，人仔細細去聽opera，邊齣呀？」
Q：「Aida呀，講你都唔識㗎啦，不過你嗰晚可以上YouTube當同我一齊睇嘅…其實我又唔係一定要睇呢啲，只不過係條仔本身都有玩音樂，佢又覺得我係呢個level所以咪揀呢啲，講真我是但睇場concert都得㗎。」
我：「是但…咁係咪楊千嬅都得？」
Q：「咁又唔太好…Black Pink或者黎明呢啲啦，不過睇opera有樣好，就係有學生飛優惠。」女神嘅是但，又點同凡人嘅是但呢，我比較專一聽妳彈琴就夠。