【代糖故系列】《她被寄宿到屋邨男孩的家中》: K176

八月廿九日，星日，晴，QQ拍拖，又同傻仔健游水，返工；八月三十日，星一，雲，屋企同QQ耍廢，夜晚佢去opera，我YouTube睇咗九分鐘瞓著；八月三十一日，星二，驟，中午QQ八婆聚…
我：「叫你落嚟你竟然要我樓下等你十五分鐘！」
健：「又話八點開始，我見就停雨咪等多下囉。」
我：「要去鑽荷聽Queenie briefing先呀，佢就到喇。」
健：「係？！咁快啲跑去MTR先！」呢條友，真係無眼睇，話就話早就放棄QQ，但一講到女就即刻上晒心，明明條路濕澾澾重要喺度跑，啲水花彈到我濕鬼晒，好彩我揀咗條深色褲嚟著啫…
QQ約咗我哋喺M記等，行咗一個圈終於搵到佢。
我：「嘩，做乜坐到咁入，軍事會議咁款喎？」
Q：「我條仔住呢附近…有啲嘢…可免則免啦。」
其實我之前都估係住呢頭，睇嚟我蠢唔晒。
我：「明白，重有半粒鐘，妳講解下一陣打算點啦。」




健仔佢未試過呢啲technical gathering，一面緊張咁。
Q：「首先，我哋係同學嚟。」
健：「嗯，我哋係同學嚟。」屌！真嘅就唔使記啦…
Q：「其次，我哋係會打機嘅朋友嚟。」
健：「明白，打機所以做到friend。」…。
Q：「咁佢哋知道你有同我雙排直播嘅，所以你可以主動少少，同人講話有提議我試下直播然後幫我上分，千祈唔好同人講我好等錢使，請你嚟幫我做效果，講到件事係自然啲，為咗玩而過癮嘅。」
健：「嗯嗯。」都唔知呢條識讀書嘅傻仔聽唔聽得明。
Q：「我唔係一個有錢女，亦唔係好窮嘅妹，大概就係最普通嗰種，當係我屋企供緊樓，而我就順便搵零用錢。」
其實我覺得會喺香港供樓嘅已經唔係普通人而係傻人…公屋萬歲！獨留在家兒童萬歲！
Q：「咁喺感情上面，我嘅狀態係A0…」




我：「而且重係一個處女…」言論不自由，毋寧死！
Q：「呢個係當然嘅，但我claim單身唔係為咗等任何人對我有興趣，只係因為我係一個乖乖女，所以暫時重未有感情需要，同你哋亦只會有純友誼嘅存在。」
按照呢個思路，就算到佢十六歲扑埋都只會係純友誼。
Q：「嗱，你哋唔使好似兵咁圍住我嘅，當一齊出去玩就得，輕鬆啲識下其他人，溝女都OK㗎。」
我：「女…有先算啦，我有嘢食就得。」
健：「我當嚟打機聚㗎咋…」
我：「女神妳搞乜鬼，落妝呀？」
Q：「唔係呀，偷薄啲條眼線，抹走緊少少粉，想素啲唔想咁搶，我今日係客唔係主角。」正一心機婊…